Nos tin un Minister cu pa 12 aña den Parlamento a sinta critica su ex Minister Rudy Croes (MEP) y ex Minister Arthur Dowers (AVP), semper cu e storia cu e sa miho y e tin un plan y e tin formulanan pragmatico pa combati criminalidad. E actual Minister a priminti cu asina e drenta Gobierno, cu e si lo haci’e miho, cu e tin un plan, cu e sa con pa maneha, cu e tin hopi experiencia como Abogado y conocemento di ley. El a laga pueblo casi haya confiansa cu berdad e por, pero awor a resultado ta totalmente diferente.

Segun Parlamentario Robert Candelaria di Fraccion di AVP den Parlamento, awo nos por mira despues di casi un aña cu e ta sinta riba e posicion, cu e Minister ta cometiendo foutnan grave, un tras di otro. Y pio ainda, no tin perspectiva cu lo bin mehoracion den su decisionnan, pasobra e mandatario ta sali di un blunder pa e comete un otro.

Ora cu un atracado ta tira su atraco, e no ta mira ken ta Minister, esey Parlamentario Candelaria ta reconoce. “Pero esey no ta e issue. E hecho ta cu e atraconan ta bin un tras di otro y nos tin un Minister cu tabatin tanto plan, tanto solucion cu e lo bin implementa, cu lo percura pa pueblo completo tin e sintimento cu Aruba ta sigur, cu nos lo biba trankil, cu nos lo por biba atrobe manera antes. Pero e sintimento cu pueblo ta sinti awor aki, con insigur nos ta, cu cuanto peliger nos ta bibando aden, ta mas halto cu nunca”, di acuerdo cu miembro di Parlamento, Robert Candelaria.

E actual Parlamentario a ocupa e funcion di Alto Inspector di Polis den pasado y como tal e sa con hendenan ta papia y con nan ta sinti. E miedo, e angustia cu tin cu awor aki, hasta comerciantenan ta pidi Polis pa para un rato prome cu cera pa nan t’ey, no ta normal. No mag di bira normal nunca tampoco. “Nos ta bibando riba un isla cu mester ta safe. Bo mester sinti bo na bo cas trankilo”.

Pero e Minister cu a priminti semper, cu e lo bay take care di e cos aki, e tin e plan y lo bay resolve, no ta haciendo esaki. A pidi despensa un biaha pa un eror, a pidi despensa pa un siguiente eror, ta bolbe sali pidi despensa. Cuanto biaha mas bo ta sigui haci esaki.

Candelaria a cuestiona esaki den pasado y e ta bolbe haci’e. “Bo ta kere cu bo mester sigui cu e trabao aki? Bo ta kere bo mester keda riba e stoel ey, mirando cu a cuestiona tur predecesornan. Mirando cu a propaga bo mes cu abo ta e guy di solucion. Awo bo tin cu puntra bo mes, cu abo no ta e hende pa e cos aki. Bo mester yega na conclusionnan pa laga pueblo sa cu bo ta refleha di bo mes”, di acuerdo cu Parlamentario Robert Candelaria.

Campaña

Den campaña a bisa cu e lo bin cu 200 Polis. Ta bin cu tur sorto di solucion. Awor aki ta bay cuminsa un klas cu solamente 14 aspirante. Ta cumpra hopi auto nobo, pero no tin hende pa stuur nan. A corta pisa den presupuesto di reclutacion, a baha overtime drasticamente y no a aloca fondo pa mas polis. Si analisa tur esakinan, ta duna un bista hopi cla cu e meneer aki no sa kico e ta haciendo.

Como Minister, Andin Bikker mester sa kico e problema ta, con pa solucion’e, con pa plama e informacion y trankilisa pueblo. Pueblo ta sintiendo miedo, e temor cada dia ta aumenta. Un Minister sali papia un rato den conferencia di prensa no ta cambia e “veiligheidsgevoel”. Sintimento bo no ta cambi’e cu palabra, sino cu hecho, asina Parlamentario Robert Candelaria a termina bisando.