Un simpel pregunta ta revela mentira y incompetencia di Gabinete Wever-Croes: dicon 12.6%? E karakter mentiroso di e gabinete aki a keda revela ora e gabinete a cambia su storia tres biaha pa bende e recorte di 12.6% den salario di ambtenaar. E prome mentira tabata cu e recorte ta pa motibo di solidaridad. Den un carta fecha 20 di mei 2020 Minister-President Wever-Croes mes ta bisa esaki. Pero, awor cu e recorte ta sigui mientras FASE ta para, a bira mas cu claro cu Gobierno deliberadamente a malinforma Pueblo.
E di dos mentira ta cu gobierno mester a haci e recorte pa motibo cu mester baha gasto di personal. No ta berdad cu gobierno mester haci cualkier recorte de gasto di personal. Locual gobierno mester haci ta recortenan structural. P’esey un recorte temporal manera esun di 12.6% no por ta un solucion pa e problema. Locual Hulanda kier pa nos haci ta pa Gobierno cumpli cu su promesa desde 2018 di bin cu medidanan structural, manera Gobierno mes a presenta den su Beleidsplan Verlaging Personeelslasten (BVP). Hulanda ta mal contento cu Aruba, pasobra Gobierno no kier ta transparente pa cu e implementacion di e BVP aki.
P’esey CAft a urgi Gobierno den cartanan di entre otro 8 november 2018, 1 december 2020, 25 augustus 2021 y hasta 1 di november 2021 pa cumpli cu e BVP y duna claridad riba e manera cu gobierno lo baha gasto na un manera structural. Aparentemente Gobierno ta confia cu Pueblo ta demasiado ignorante pa por compronde cu e 12.6% no ta un solucion structural. Esey ta haci e mentira aki hopi tecnico y astuto. E di tres mentira ta cu Hulanda a bira impone 12.6% riba Aruba. Esaki tambe ta un mentira hopi tecnico. Nos tur por corda con Ricardo Croes tabata grita ‘pacta sunt servanda’. Esaki ta significa cu si bo palabra algo bo mester cumpli cu ne. Bo mester ta un persona di bo palabra. For di momento cu señora Evelyn Wever-Croes firma e acuerdo hunto cu Knops, no ta Hulanda ta mara Gobierno, pero ta e firma di señora Evelyn Wever-Croes mes ta mara Aruba. P’esey e mensahe di Hulanda na Aruba awor ta: pacta sunt servanda.
Locual ta mas lamentabel ainda den e debacle aki di e 12.6% ta revela e incompetencia di Gabinete Wever-Croes. Nos por a mira un incompetencia pa negocia. Nos a mira incompetencia pa aplica principionan di bon gobernacion y integridad. Pero, tin un problema cu a crea mas disgusto ainda. Gobierno a traha un ley cu a trece e recorte den salario di ambtenaar, pero no a traha ningun ley pa corta den salario di empleadonan di e sector semi-publico. Di e manera aki Gobierno a crea un sentimento di desigualdad cerca e ambtenaar cu a sinti cu e peso di solidaridad ta solamente cay riba su schouder. Ademas Gobierno a crea e situacion na unda e ambtenaar tin un obligacion legal pa entrega su salario, mientras cu un obligacion asina no ta conta pa e empleado di e sector semi-publico. Awor cu e baca a hoga caba y nos tur por a mira e incompetencia, Minister-President Evelyn Wever-Croes kier menasa cu lo bin cu un ley.
