fbpx
Edit

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 E contract cu Eagle LNG a resulta di ta SPOORLOOS

Den e Reunion Publico encuanto di e contract cu a firma cu Eagle LNG a bin padilanti cu dicho contract a ser firma sin cu partners den coalicion ni Parlamento a ser informa. Segun Wyatt-Ras ta na su  lugar con sr. Kamperveen den su funcion como vicepresidente di Parlamento a yama un reunion pa trata e asunto. Esaki despues cu e Presidente di Parlamento Vrolijk na un forma ilegal a core yama un Bijeenkomst cu un caracter informativo pa evita un Reunion Publico, mientras e no tabata ni na Aruba. E miembro di Parlamento di fraccion di Raiz, vice-presidente Kamperveen, a trece su punto di bista padilanti den prensa. Partido Raiz tambe a saca un comunicado di prensa. Den e comunicado ta menciona cu e contract a ser firma cu Eagle LNG sin cu miembronan di coalicion ta na haltura. Tampoco no a consulta den Ministerraad. Partido Raiz ta exihi den e comunicado pa pospone firmamento di e contracto y bin cu un investigacion.

Durante e reunion Publico cu a dura 2 dia, casi tur parlamentario a pidi pa e famoso contract ser entrega na Parlamento, sinembargo esaki a resulta di ta SPOORLOOS. E contract no a ser otorga na Parlamento. Ademas segun minister Glenbert Croes, encarga cu labor, y Evelyn Wever-Croes, encarga cu utilidad, nan mes no a lesa e contract. Con por ta posibel cu 2 minister ta mara Aruba pa 20 anja pa un suma cuantioso sin lesa e contract?  

Den e mocion cu sr. Kamperveen a presenta, co-firma dor di miembronan di fraccion di MEP, e ta pidi pa haya e contract y e ta haci un peticon na gobierno pa envolvi Staten den decisionnan cu ta ensera obligacionnan “ingrijpend y landurig”. Aki e y fraccion di MEP ta duna nan gobierno un “brevet van onvermogen”

Hacimento di cos skondi y bisa cu “mi no sa di nada” ta algo normal pa e minister presidente y e gobierno aki. Ya caba ora a firma landspaketten cu Hulanda na 2020, e ministro presidente no a constulta cu stakeholders. Mescos a sosode cu cortamento di 12.6% den salario di ambtenaren cu no a constulta cu nan. Den campanja,  gobierno a priminti cu FASE lo bira TIO cu un suma mas halto pa yuda cuidadanonan, sinembargo esaki tabata otro enganjo di e gobierno aki. No a bin ni TIO ni TIA ni FASE, sino zero FASE y nulo yudansa. Ta pesey empleadonan publico cu a coopera anteriormente awor no ta acepta mas y kier nan pago manera promer cu COVID. 

Pero manera semper ora cos ta cayente e ministro presidente ta bula pipa. Paso ora cu minister Glenbert Croes tabata na e ceremonia di firmamento e promer minister tabata cu vakantie. El a laga e minister di labor cu e batata cayente. Pero e no tin cu worry paso ta su cuña el a nombra na cabes di WEB NV pa tur cos bai manera e kier y cu e por ta bon informa di tur cos. 

No ta nada stranjo cu esnan di MEP ta intransparente y no ta duna informacion na niun hende paso nan sa tog cu nan soldatnan den Parlamento lo sostene tur loke nan haci. Den e caso aki sr. Kamperveen cu a sali critico pa haya informacion no a haya esaki pero encambio a ser silencia. 

Locual Wyatt-Ras como ex-presidente di Parlamento ta haya mas peor ta cu e actual presidente di Parlamento ta usa reunion di caracter informativo, manera un Bijeenkomst, pa trata asuntonan cu mester bin den Reunion Publico. Den un Bijeenkomst tin presentacion pa despues haci preguntanan al caso sin mucho introduccion ni tiramento di palabra. Sinembargo e presidente aki cu no sa su trabou ta laga Parlamentarionan, especialmente di su fraccion y ministernan di su partido, haci politikeria durante Bijeenkomsten, dor di cual invitadonan hasta por sinti nan mes incomodo. Na final e ta culpa oposicion. Dor di su actitud e ta haci cu instancianan respeta no ta haya gana mas di bin Parlamento pa duna splicasion. Ademas poco poco ta mina e autoridad di Parlamento dor di haci kico gobierno dicta y ta pesey mes Hulanda no tin ningun respet pa e gobierno aki.  Ta pesey mes ta bin cu landspaketten paso Hulanda ta mira e falta di seriedad, nepotismo cu favoritismo di amigo y famia cu intransparencia cu ta bai hunto cu corupcion. 

Ta irresponsabel con gobierno ta compromete nos pueblo pa 20 anja sin ningun garantia, paso no por bisa cuanto prijs di gas lo ta den futuro. E hecho cu desde diabierna no lo tin subsidio mas na Merca pa exportacion di gas siguramente lo haci cu e prijs di gas lo por bira mas caro . Esaki mientras por a compronde cu 70% di e prijs di gas so lo ta fixed. Esaki kiermeen cu e prijs di awa y coriente lo no baha lihe dor di e hazanja desatroso aki. 

Durante reunionnan na Glasgow encuanto “global warming” a palabra cu pa anja 2030 lo disminui uso di fossiel fuels y na 2040 lo no tin mas y lo mester paga “fees” si ta haci uso di energia fosiel. Na mesun momento y contrario na loke mundialmente ta ser acorda, Aruba ta sera contract te cu 2042 di fuel fossiel. Esaki mientras gobierno ta pretende di ta pro naturalesa y hasta tin minister encarga cu e cartera Naturalesa. 

Segun por tuma nota di literatura gas ta pega candela mas liher y por explota. En bista cu lo core pipa di gas di San Nicolaas pa Barcadera, pasando den barionan di pariba manera San Nicolaas, Zeewijk, Noord Cura Cura Cabai,  Savaneta, Pos Chiquito pa Barcadera ta na su lugar pa envolvi nos pueblo den esaki. Tempo cu gobierno kier a coloca molinanan di biento na Urirama e prome minister actual tabata contra. Awor cu tubonan lo pasa den e barionan banda di viviendanan y cura di casnan, cu e peliger di explosion y candela, awor si e ta pro. Mescos cu molinanan di biento na Vaderpiet tabata posibel, pasa tubonan den bario pariba di nos isla tambe ta posibel pa e gobierno aki y e parlamentarionan cu ta sosten’e. Ya pueblo di Aruba sa cuantor tin cu e coalicion aki. 

Sin cu Raiz ni Mep a ricibi e contract, a dobla rabo. Fraccion di AVP a presenta dos mocion. E prome ta un mocion di desconfiansa den e prome minister e otro ta regarda desaprobacion di e LNG deal y pa gobierno deisolve e deal aki. 

Leave a Reply

Your email address will not be published. Required fields are marked *