fbpx
Edit

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 E “Geek Love” di señora Evelyn

Diamars dia 14 di december nos den Parlamento por a gosa di un actuacion teatral di nos prome minister señora Evelyn Wever-Croes den optima forma. Cu hopi fanfaria y un gran sentido pa drama y spectaculo el a mustra un variedad di emocion: rabia, desapunto, sorpresa, cinismo, amargura y victimismo. Señora Evelyn a proyecta su mes como un persona tremendamente transparente y inmensamente integro.

Na dado momento señora Evelyn a cita lo siguiente durante pleno Openbare Vergadering: “The truth is always an insult or a joke, lies are generally tastier. We love them. The nature of lies is to please. Truth has no concern for anyone’s comfort”. E frase aki ta di e buki “Geek Love” di autora Katherine Dunn cu a ser publica na 1989. E buki ta conta e storia di un pareha Binewski cu ta haci experimento cu droga, kimico y material radioactivo riba nan mesun yiunan. E pareha Binewski tabata tin e don pa inspira un devocion fanatico y crea un disgusto asesino entre su mes famia. O sea, ta trata di un storia completamente sick di un famia hororosamente disfuncional, yen rivalidad maquiavelico entre nan cu nan. 

E buki aki, cu aparentemente señora Evelyn tin riba su nightstand, ta pon’e sinti poderoso pa motibo di por ehempel e siguiente frase: “lunatics are created deliberately by those who wish to be presided over” of e siguiente frase nativista: “A true freak cannot be made. A true freak must be born.” No lubida cu señora Evelyn, manera otro Mepista prominente, ta kere cu integridad ta algo cu nan ta nace cu ne. Pero e realidad ta cu ningun baby por haci distincion entre bon y malo y tampoco ningun mama ta siña su yiu e procedura pa tuma un decision gubernamental of pa reconoce un conflicto di interes. Bon gobernacion no ta surgi di su mes. Nos mester educa nos mes y esforsa nos mes pa nos crea un sistema mas husto. Esaki ta rekeri structura, procedura y normanan pa coordina nos esfuerso pa goberna di un manera realmente integro.

Ora ta trata di nepotismo señora Evelyn ta purba tapa e berdad cu dos sofismo (argumento falso). E prome ta un argumento di autoridad (“ad verecundiam”): segun señora Evelyn den su gabinete no tin nepotismo pasobra ley ta permiti pa primonan ta den conseho di minister, ley ta permiti cu señora Evelyn ta nombra un primo den un funcion den un compania estatal y ley ta permiti cu oficina di su tata ta consehero principal di companianan estatal cu ta cay bao su responsabilidad. E problema cu e argumento aki ta cu nepotismo no ta un concepto legal. No tin ley cu ta specificamente haci nepotismo castigabel. Mescos cu tampoco tin ley cu ta haci conflicto di interes castigabel. Pero ambos ta ser considera e prome paso pa concretisa corupcion y esaki si ta castigabel. Si bo combina un falta di transparencia den e mix, e chens ta bira hopi grandi cu corupcion ta tuma luga sin cu ningun hende ta ripara y sin cu OM lo por haya prueba. P’esey tanto nepotismo como falta di transparencia ta un violacion di integridad.

E di dos sofismo ta cu señora Evelyn ta un autoridad cu sa e definicion corecto di nepotismo. Pero e argumento aki tambe ta deshonesto, pasobra e ta cambia e definicion na e manera cu ta conveni su situacion: “nepotismo ta, ora cu bo ta nombra famianan of amigonan den posicion halto solamente pasobra nan ta famia of amigo.” Señora Evelyn ta añadi cu ta trata di nepotismo solamente si e motibo pa e nombracion ta “solamente pasobra nan ta famia of amigo”. Ora bo ta studia nepotismo bo lo mira cu e motibo pa nepotismo ta hustamente pa crea un conflicto di interes, pasobra sanger ta mas diki cu awa. No ta asina cu e famia su capacidad ta necesariamente menos of e famia no tin credencial. Mester bisa si cu hopi biaha nepotismo ta causa cu hende cu menos credencial ta haya un puesto mas halto cu esun cu mas credencial: “It’s not what you know, it’s who you know.” Pero no kere cu e fabor ta completamente basa riba amor fraternal. Esun cu ta fix bo, ta expect cu bo lo fix e bek na su debido momento. Esaki ta locual nos ta yama patronahe politico. P’esey bo no mester laga señora Evelyn bruha tera cu e idea cu Gabinete Wever-Croes no conoce nepotismo pasobra segun señora Evelyn tur su famianan y hendenan liga cu a haya un contract of funcion tin nan credencial.

Finalmente, manera semper: haci bo mesun research! Hende por faya, kiboca y gaña. No sea ingenuo y keda critico. Esey lo crea un miho futuro pa bo, bo famia y henter Aruba.

https://www.accountant.nl/achtergrond/2020/10/corruptiebestrijding-zijn-accountants-onderdeel-van-de-oplossing-of-van-het-probleem/

https://www.accountant.nl/opinie/2019/11/the-slippery-slope-van-nepotisme-naar-corruptienew-page/

Leave a Reply

Your email address will not be published. Required fields are marked *