“Ken por bisa no na vison. Na un futuro sostenibel. Na un futuro balansa?” Diaranson anochi e ‘mucha’ humilde di Savaneta, dokter Alex Schwengle a anuncia su candidatura riba lista di partido AVP. Esaki a sosode na cas di su mayornan Ina y Ping Schwengle y den compania di su señora Janine y nan dos yiunan den e bario di Savaneta. E apoyo pa e candidato nobo ta masal. Un multitud enorme tabata testigo di su compromiso na partido AVP. Su discurso tabata wordo interumpi pa gritonan di sosten y aplauso. Alex Schwengle a yama tur hende bon bini den su cuna y a gradici nan pa nan presencia y sosten. El a bisa di ta masha orguyoso di ta Savanetero. Esey semper e ta propaga. Claro cu na prome lugar e ta orguyoso di ta Arubiano.

“Ora hende puntra mi di unda mi ta bin, semper mi contesta ta ‘Mi ta bin di e pueblo orguyoso di Savaneta. Di e comedonan di masbango, e batidonan di bloky y….di e prome capital di Aruba”. Schwengle a bisa e publico entusiasma cu na su cas el a siña cu respet y amor pa prohimo, mescos cu e balornan di fe, disciplina y traha duro ta importante. Esaki ta loke a forma e base di su educacion. Den un tono trankil el a splica cu e decision pa drenta arena politico no tabata facil pa tuma.

“Esaki ta nifica cu mi famia y ami mester sacrifica hopi, den tur sentido. Alabes mi ta laga atras mi pashentnan cu mi ta stima hopi”. El a conta cu e tabatin combersacionnan largo y intenso cu Mike Eman. “Eman a bisa mi cu e dianan ta bay ta largo, e pago relativamente malo y cu despues di 4 aña mi cabeynan ta bira blanco”. Schwengle a bisa cu traha duro p’e no ta un problema, pasobra mescos cu su mayornan e ta gusta traha.

“Pero, traha duro ta un cos, traha sin vision ta algo otro. Traha duro y sin vision ta tempo y energia tira afo. Awenochi mi ta bisa lider di AVP Mike Eman y mi pueblo cu mi ta dispuesto pa uni mi mes na e fila di AVP. Pasobra cu AVP tin e vision. Un vision pa futuro cu ta alentador. Ken por bisa no na un futuro sostenibel, na un futuro balansa? Aspectonan cu ta necesario den salubridad”.
Dokter Schwengle tabatin palabranan di hopi elogio pa e bon trabou haci pa Minister Visser. Su trabou den prevencion ta importante mescos cu e echo cu e kier bin cu un centro di radioterapia na IMSAN. E forma di busca dialogo di Gabinete Mike Eman a trece trankilidad entre e mediconan y AZV.
Schwengle a splica cu p’e ta importante e balansa den Salubridad poniendo semper e ser humano na prome lugar. Esaki ta wordo logra si tur hende envolvi traha hunto pa un meta comun. El a mira cu AVP ta e vehiculo pa logra hopi, no solamente pa su pashentnan, pero pa Aruba en general.
Finalisando su bunita discurso dokter Schwengle a bisa “Pa contesta e pregunta di Mike Eman si mi ta dispuesto pa traha pa pueblo, mi contesta ta: SI!! Mi ta bisa SI pa bin reinforsa e team di salubridad publico. Mi ta bisa SI na e reto, Mi ta bisa SI di ta dispuesto pa sacrifica pa mi pueblo. Pa mi Aruba stima bay dilanti”.

Despues a sigui un celebracion tur afo cu mariachi pa recorda cu dia 24 di april dokter Schwengle mescos cu Minister Visser a bira un aña mas bieu.