ORANJESTAD, Aruba – 31 di mei 2013: Anticipando eleccion cu ta tuma luga dia 27 di september proximo, Ing. Mike de Meza, actual Minister di Finansa, Comunicacion, Utilidad y Energia a start su campaña cu un evento bon atendi na Lone Palm Stadium, banda di Baby Beach na San Nicolas.
For di 10or di mainta e evento a ranca sali cu un bar y cushina bon surti. Separa di bon ambiente, hopi cuminda y coy bebe, tambe tabatin presentacion di X-Lance, Le Groove y OREO. E evento a conta cu un publico grandi, cu a bay saluda e politico. Ing. Mike de Meza ta masha popular y conoci como e embahador di San Nicolas. Banda di su responsabilidad como Minister di Finansa, e ta e promotor di mas grandi di tur desaroyo p’ariba di brug.
Varios colega Minister tabata presente na su evento, mescos tambe ta algun miembro di Parlamento cu a pasa brinde sosten. Den su discurso el a yama danki na tur cu a atende su evento pa recauda fondo. El a sigura cu Gobierno a haci un “bon trabou” caba na San Nicolas pero cu ainda falta. Ta den e cuadro ey e ta uzando e slogan “Brighter days ahead” den cual ta referi na varios desaroyo nobo cu lo mester bin ainda.
Na e evento aki mes a anuncia un proyecto grandi di 2.8 miyon florin cu ta start den 6 siman di tempo, den cual lo renoba y embeyece henter e area rond di Baby Beach. E intencion ta pa haci e sitio mucho mas agradabel pa por sigui atrae tanto turista como nos localnan.
“Mi ta hopi contento, e actividad tabata hopi bon, un berdadero family day”, asina Ing. Mike de Meza a duna di conoce durante e evento. El a keda masha contento di mira amigonan hunto, famia completo, hende grandi y mucha, tur a gosa hungando weganan di domino, bula den Dino Jump, baila riba ritmo di e bandanan invita y sin lubida e dushi cumindanan na benta.
“E locual cu Aruba ta bay mira riba caminda for di e skina di mi hendenan ta algo tremendo cu nunca bisto. Esaki ta bira mi di 4 campaña y e ta bay ta e campaña di mas agresivo, esun mas grandi cu mi a yega di core. We’re going to hit it all out!”.
E mandatario a bisa na final di a keda sumamente satisfecho cu e aceptacion, pa e acogida creciente cu e tin tur rond di nos isla pero specialmente pariba di brug. E trabou duro cu nan a haci ta bisto pa tur hende y ta hayando sosten pa e bon trabou.
“Pueblo mes por mira kico tur nos a haci e ultimo 4 añanan. Esaki ta un team cu ta traha pa pueblo y no pa nan mesun saco of di nan amigonan of famianan. Nos filosofia ta cu si nos hiba Aruba padilanti, tur hende ta bay dilanti”, asina Ing. Mike de Meza a bisa cu un sonrisa di orguyo riba su cara.
