“Como generacion nobo nos tin e deber di mantene e balornan cristian-democrata bibo”
Na vispera di un aña nobo partido AVP, lidera pa sr. Mike Eman, semper a dirigi su mes na pueblo di Aruba. E biaha aki no tabata un excepcion y a haci’e en conhunto cu demas miembronan di partido, entrenan Richard Arends, ex-minister di Asuntonan Economico y actual miembro di Parlamento pa fraccion di AVP. Den su discurso sr. Arends a para keto riba e balornan cu nos ta recorda den e dianan di fiesta cu a transcuri y cu como generacion nobo tin e deber pa salvaguardia nan.
“Un di e balornan mas importante cu e temporada aki ta recorda nos ta cu nos mester defende esnan cu mester di proteccion y proteha esnan cu ta victima di inhusticia,” e parlamentario a bisa. Ademas el a remarca cu e temporada aki ta un temporada cu esnan cu por, ta duna un man na esnan mas vulnerabel. E la sigui bisa cu esaki ta un temporada unda di un manera solidario nos mester comparti e peso, pero tambe e prosperidad di nos sociedad. Tambe Arends a indica cu nos, como politico y mandatarionan, tin e responsabilidad di garantisa un bienestar duradero pa generacionnan cu ta bin manehando nos recursonan di un manera responsabel.
E balornan aki no ta solamente e balornan cu e storia di Pasco a siña nos y cu a perdura durante tur e siglonan, pero ta e balornan social-cristian cu ta forma e fundamento di partido AVP. El a enfatisa cu e balornan aki mester keda bibo, no solamente den e dianan cu a transcuri, pero tambe durante henter aña y tur dia di nos bida. Arends a haci un yamada na e generacion nobo di politico y mandatarionan ya cu nan tin e deber pa mantene e balornan aki bibo.
“E temporada di Fin di Aña semper tin un sentimento di speranza y di fe cu ta compaña cada inicio di un etapa,” sr. Richard Arends a bisa. El a agrega cu hunto cu e sentimento di positivismo pa yama bon bini na e aña nobo, nos mester para keto un rato riba loke ta berdaderamente importante pa nos como sernan humano. “E temporada aki ta un temporada unda cu e balornan di mas bunita mester bin dilanti,” e parlamentario a bisa.
“Bou liderazgo di Mike Eman, fraccion di AVP den Parlamento, coleganan di partido nos lo sigui duna nos aporte pa e balornan aki permanece bibo tur dia di aña”. Arends a finalisa bisando cu e ta convenci cu nan contribucion lo haci un diferencia pa yuda esnan mas vulnerabel, proteha esunan cu mas mester di proteccion y ta mas solidario un cu otro.
