Lider di AVP, mr Mike Eman: Awe nos Pueblo ta sufri na man di un gobierno di persecusion

Den un eloquente discurso Lider di AVP y Ex Promer Minister di Aruba, mr. Mike Eman a mira bek riba e anjanan di su gobernacion y e dedicacion na sirbi Pueblo y Pais cu amor y devocion. Esaki ta e palabranan conmovedor di e Promer Minister di Aruba di 2009 pa 2017 cu a transforma nos Pais pa uno cu awe ta un ehempel den mundo pa su desaroyo moderno y cu atencion special pa e calidad di bida di e Pueblo di Aruba:

“Awenochi nos ta celebra e yegada di un anja nobo. Un momento di espectativa y compromiso.8 anja pasa riba e anochi aki mi a priminti bosonan cu e anjanan nos dilanti lo ta anjanan den cual hopi lucha y sacrificio lo worde desplega pa Aruba por supera e crisis den cual nos a encontre.

Nos tabata sa kico e reto ta. E dolor y inquetud tabata marca nos punto di salida; refeneria Valero sera, turismo den decadencia, avionan y barconan importante no tabata bin mas, desempleo grandi, perdida di entrada, pobresa, centronan di ciudad y barionan den deteoro, scuridad y abandona dor di anjanan di negligencia, Aruba den discordia cu Reino Hulandes y na cas mes anjanan di polarisacion a sera porta pa dialogo, comprension y convivencia. Asina nos a haya Aruba 8 anja pasa.

Frente e retonan aki, cu un confiansa grandi otorga pa pone Pueblo y Pais na promer lugar, cu un curason yen di compromiso, mi a bisa cu mi tey cu bosonan. Sea cual sea e sacrificio personal, mi empenjo lo ta incondicional. Cu hunto nos lo lucha te na e momento cu pueblo recobra su felicidad y Aruba lo ta para riba su pianan atrobe.

Cu e espirito di compromiso aki nos a inicia e trabao. Lora manga y traha. Dianan largo, simanan sin fin di siman, di dia pa anochi. 8 anja largo pa Aruba por a biba un diferencia y awe e ta bisto tur rond di nos isla.

Compromiso y cumplimento cu promesa y espectativa tabata e fuente di nos energia, fislumbrando luz caminda tabata tin scuridad y inicio di felicidad caminda tabata tin tristesa a tene nos cu mente, curason y alma dedica riba e trabao cu mester worde haci.

Na final di e e mision grandi di 8 anja nos por raporta na bosonan cu nos a traha incansablemente den tur skina di nos Pais, den tur bario, di Juana Morto pa San Miguel, di Angoochi pa Madiki, tur caminda nos a traha pa haci un diferencia.Di P”riba P Bao di PaZuid PaNord, incansablemente mi a sirbi, nos a siribi nos Pueblo y nos Pais.

Den nos fe nos a haya e forza pa a entrega nos labor di dia pa anochi pa sirbi Bosonan nos conciudadanonan.

Ora nos a asumi responsabildad Aruba tabata tin mester un sentido di conviccion. Nos tabata tin mester di un sentido di proposito atrobe; un meta comun. Un vision cla di Aruba di mayan den cual nos tur por pone confiansa, energia, labor, inventividad y creatividad.

Nos a tuma e responsabilidad aki seriamente. Cu trabao serio y analyses profundo a prepara un Plan integral pa Aruba y un equipo di profesionalnan cu por a carga e retonan nobo di nos pais, cu por uni nos comunidad cu un apelacion riba su mihor instintonan pa servicio nacional, pa realisa metanan mas noble cu ta transende desaroyo economico. E calidad di nos relacion uno pa otro; di nos pa cu nos naturalesa; pa cu nos atmosfera; pa cu nos paisahenan; pa cu nos barionan; pa cu nos hogarnan; pa cu nos futuro generacion.

Cu un gradicimento profundo y cu admiracion pa e madurez y e sentido di responsabilidad comparti cu gremionan sindical y empreserial a demonstra mi ta wak bek riba e momentonan cu nos a conoce apertura di un epoca nobo den democracia di Aruba cu creacion di un plataforma di un Dialogo Social sin precedente. Un Dialogo Social cu a produci e acuerdonan cu a rescata e fondo di Pensioen di Empleadonan Publico, cu a saca e fondo di Pensioen di nos grandinan for di su agudo eminente, cu nos a duna pensioen na empleadonan di casnan di nos grandinan cu nunca tabata tin un pensioen, cu nos a crea un pensioen  general pa tur empleado, cu nos a introduci pa Aruba un reparatietoeslag, un forma di compensacion directo pa ciudadanonan recupera poder di compra, incentivonan nobo pa inversion, haci Aruba un Pais sostenibel y moderno.

Cu trabao duro y devocion nos a traha pa Pueblo y Pais.

Hunto nos a carga nos Pais riba nos schoudernan y rescate for di e crisis social economico cu nos a haye aden y renobe for di e deteoro total cu e worde laga aden y dune progreso, perspectiva y oportunidad. Semper cu amor y dedicacion. Semper husto, cu humildez, nunca cu rabia pa cu nos oponentenan. Semper den dialogo y respect pa partnernan social, nunca cu mal uso y arogancia di poder. Esaki ta virtudnan cu nos a haya for di e base di nos existencia. Amor Prohimo, solidaridad y convivencia cu Bo semehante. Husto pa cu tur hende. Esaki nos ta bai tin mester pa ta cla pa rescata Aruba atrobe for di antagonismo, persecusion, rincor, abismo y polarisacion y hacie atrobe un Pais cu gobernacion y liderazgo di aprecio y amor cu vision y bon voluntad pa garantisa felecidad pa un y tur

Para na e momento di inicio di un anja nobo nos ta gradici nos Creador pa e logronan cu nos por a realisa pa nos Pueblo y Pais y e forza pa biba den e presente y e luz cu ta ilumina nos futuro.

Cu Dios bendiciona Boso hogar y yena Boso curason cu fe y felecidad.

Di mi parti, di mi senjora Doina y mi coleganan. Bon anja.