Segun Dello Gomez pais Aruba no tin hurisdiccion pa investiga y – si iregularidadnan wordo constata – pa disciplina esunnan envolvi den e caso di Arubahuis. Aparentamente Dello nunca a scucha di hurisdiccion extrateritorial basa riba principio di nacionalidad, seguridad y univesalidad. E realidad ta cu minister-president tin autoridad pa duna instruccion na Arubahuis, na minister plenipotenciario pa Aruba na Hulanda y empleadonan publico di Aruba na Hulanda. Parti di e contesta bo ta haya door di un simpel consulta di nos Landsverordening instelling ministeries 2022, articulo 1.

Como cu minister-president tin autoridad riba e minister plenipotenciario na Hulanda y e empleadonan publico eynan , ta minister-president mes ta politicamente responsabel pa locual nan ta haci. Ta minister-president mester duna cuenta na Parlamento pa locual a tuma luga of laga di tuma luga na Arubahuis. Di acuerdo cu derecho constitucional tin tres etapa den e proceso di responsabilisa un minister. Tin e etapa di informacion cu ta duna parlamentarionan e derecho di pidi informacion (vragenrecht). Na su turno e derecho aki ta crea e obligacion pa e minister pa duna informacion (informatieplicht). Ta den cuadro aki e parlamentarionan a haci pregunta na minister-president. Como cu minister Evelyn Wever-Croes ta nenga di duna informacion e ta viola nos derecho constitucional. Esaki mester ta un factor pa Pueblo considera ora di vota. Despues ta bin e etapa di debate. Locual nos ta mira ta cu señora Evelyn Wever-Croes ta core pa e debate aki cu argumentonan fofo pa evita otro reunion publico cu ta cuestiona su integridad. Por ultimo ta bin e etapa di sancion, manera por ehempel un mocion di desconfiansa. Segun nos constitucion un minister cu haya un mocion asina, mester entrega su retiro. Naturalmente minister-president no mester tin miedo pa un mocion asina, pasobra e stempel di su sirbidonan den Staten ta sigur.

E realidad ta cu ta señora Evelyn Wever-Croes ta core pa duna cuenta pa locual a tuma luga na Arubahuis den un forma serio, responsabel y transparente. Esey ta un señal claro cu integridad ta solamente un slogan di mercadeo p’e y cu e no merece Pueblo su confiansa mas.