Violencia contra di hende muhe of maltrato di hende muhe ta un fenomeno mundial. Ora tin abuso di poder contra un otro persona esaki tin su impacto ariba e yiunan y nan desaroyo den futuro. Na Aruba tambe e ta un problema. Pa añanan diferente instancia ta duna yudansa na victimanan y nos cuerpo policial ta atende cu casonan di violencia di hende muhe como di hende homber. Claro ta cu tin cu sigui atende y sostene e victima y tambe preveni. Mester keda fortifica imagen di un mucha y hobennan pa nan siña defende nan mes. Hopi di esunnan cu ta victima di maltrato pa motibo di dependencia economico pero tambe emocional ta keda den e relacion abusivo. Tambe miedo ta haci cu nan no ta tribi di sali for di e relacion.
E situacion ta complica unda tin in patronchi den e relacion entre e pareha. Nan por ta bon cu otro. Diripiente ta surgi e maltrato y despues di esaki esun cu a maltrata ta busca acercamento pa drecha e relacion y esun cu ta victima su confianza a ser kibra. Despues e pareha ta haci bon pa purba drecha e relacion y drenta den un fase di romance entre e pareha. Cos ta bolbe drecha entre e pareha y despues cu drenta den un situacion rutinario e violencia por bolbe surgi y asina ta keda bay y bin den un circulo vicioso. E circulo aki solamente e persona cu ta ser maltrata so por kibr’e. Pesey instancianan ta eynan pa ofrece yudansa. Tin biaha profesionalnan ta fada paso despues di tanto maltrato tog e victima ta scoge pa no entrega keho of ta trek e keho aden of si el a bandona cas cu su yiunan ta dicidi di bay cas bek. Tin persona ta keda pa semper den e situacion cu tur consecuencia cu esaki por tin pa e yiunan cu ta biba den violencia y incertidumbre.
Actualmente tin 2 caso hopi comenta den prensa.
Ta trata di 2 persona locutor conoci. Por a tuma nota cu un di e locutornan a distancia su mes di su trabou dor cu e tabata envolvi den caso di violencia cu su pareha. Wyatt-Ras por a scucha su declaracion cu ora bo ta un figura publico y ta un ehempel pa otro ta bon pa asumi bo responsabilidad. E locutor aki a duna un bon ehempel. El a retira y lo bay refleha riba loke a pasa y eventual lo por busca yudansa. Un otro caso den cual un otro locutor ta envolvi tampoco e victima a duna keho, mientras yiu muhe di e victima a bin padilanti y declara cu el a ser abusa sexualmente dor di e persona cu a maltrata su mama. Wyatt-Ras mes a yega di presenta leynan di iniciativa den parlamento pa proteha victimanan. Wyatt-Ras ta gosa e mucha muhe cu a sali padilanti y duna keho despues di añanan di y ta di opinion cu e mester haya oido. Independiente di ken ta envolvi den e caso aki Wyatt-Ras ta haya falta di e Minister di Asuntonan Social. Pasobra na momento cu a drenta gobernacion e minister a bin ta critica y bisa cu gobierno anterior no a haci nada pa evita y trata cu abuso di mucha y
violencia y cu tampoco no a haci nada pa e sector social y a haci comosifuera cu awor cu e ta den gobierno e si lo bay elimina tur abuso y maltrato. Minister a presenta un plan social cual Wyatt-Ras y su fraccion a sostene e fondo pa financia e area social. Pesey mes Wyatt-Ras ta spera cu e minister aki lo bay sali duro pafo y tuma un posicion contra abuso y maltrato. Esey Wyatt-Ras a spera di e minister. Pero mescos ora cu minister di husticia a laga acusadonan liber mucho tempran e minister a keda muisstil. E no a bin padilanti pa defende niun victima. Esaki mientras cu ora el a drenta gobernacion el a haci comosifuera cu awor cu e gobierno nobo lo no permiti ningun abuso tuma luga y cu niun abuso no lo tuma luga. Awe por nota cu esaki no ta cuadra cu realidad. E minister aki envez di mustra cara ta keda keto keto, esta muisstil. Esey tabata e discusion cu Wyatt-Ras tabatin cu e minister. Esta cu por haci hopi esfuerso pero tog casonan lo sigui surgi y awe Wyatt-Ras ta haya rason. Ta importante cu educadornan, mayornan y tur cu tin di haber cu mucha por preveni abuso y maltrato. Pa fortifica nos muchanan pa nan por tin un imagen propio halto y por para fuerte contra di abuso.
Por cierto un di e personanan envolvi ta cay bao di cartera di e minister di Asuntonan Social. Wyatt-Ras ta keda pendiente di reaccion di e minister.
Ta spera cu e minister por sali mes fuerte cu el a sali den comienso pa atende cu e asunto aki. E minister lo por mustra si e ta walk su talk pa sali pa e persona cu ta victima di abuso y maltrato. Paso papia bunita ta un pero haci ta otro cos.
