Diaranson 16 januari 2019 e plataforma di hobennan profesional (PHP) a anuncia cu nan proyecto “Building knowledge 2019” lo consisti di un serie di lectura riba temanan moderno y di interes general. E prome di e serie di e lecturanan lo bay over “Leadership & new generation of politicians” cu lo tuma lugar 23 Januari 2019. E lectura lo conta cu dos orador sra. Sharleen Tromp y sr. Karsten Klein (CDA).
Ya caba, Klein ta na Aruba pa duna charla pa e profesionalnan hoben. E lo conta su propio experiencia con el a cuminsa y lo comparti cu e hobennan varios tips con nan mes por cuminsa den e mundo di Leadership.
E lo bay conta riba e proximo eleccionnan Europeo y tambe estudio den exterior y ki beneficionan esaki tin.
E ta invita e profesionalnan hoben y kier sa di nan kico ta nan deseo, pa asina nan por studia mas amplio y dunanan bon informacion riba e programa di intercambio di Erasmus Universiteit.
Plataforma Hubenil profesional
Juan Manuel Kelly, di Plataforma Hubenil Profesional, a splica cu nan ta bezig cu un proyecto nobo pa 2019 cu yama Building Knowledge y nan ta biniendo cu e charla, ariba menciona. E lectura aki lo tuma luga diaranson, 23 di Januari. Karsten Klein ta un di e oradornan, como tambe Sharleen Tromp, kende lo bay papia riba Leadership y tambe riba e area di desaroyo personal. E lo enfoca tambe riba kico bo tin cu haci pa mehora bo talentonan. Kico bo por haci pa sembra e simiya, crece den bo talento. Lo bay ta un anochi hopi educacional.
Kelly ta invita tur studiante, tur profesional, tur esnan interesa den engrandece nan conocemento, pa forma parti di e lectura aki cu lo bay tuma luga na Cas di Cultura, for di 7’or pa 9’or di anochi. Entrada ta completamente gratis. Ta conta e presencia di un y tur pa haci e proyecto aki un exito.
Sostene hubentud
Robert Candelaria, parlamentario di AVP, a comenta cu nan ta hopi contento cu Karsten Klein a bolbe bin Aruba. E tabata na Aruba caba pa e evento grandi cu nan tabata tin di Cumbre, cual a tuma luga algun tempo pasa.
Awor aki e lo bay traha hunto cu e Plataforma di Hobennan Profesional pa duna un charla.
Ta importante pa para keto na e hecho cu politica ta algo cu ta keda desaroya su mes. Awor aki ta mirando cu generacion nobo di politiconan na Aruba, pero tambe na Hulanda, lantando. Ta importante pa siña di e experiencia di esnan cu tabata prome cu nan, pero tambe pa duna un bachi moderno di con ta kere cu tin cu bay, kico ta e elementonan cu por trece pa modernisa y profesionalisa nos politica.
Cu esaki, Karsten Klein por duna un bon contribucion na esaki. Candelaria ta haci un invitacion pa tur hende, pa bin anochi un rato, vooral pa e Young Professionalsnan na Cas di Cultura. Lo aprecia pa bin cu un mente critico, bin pa participa y haci pregunta. Asina por siña, por crece y traha riba un politica di nivel mas halto.
