Un di e puntonan importante cu Parlamentario Michael Lampe a atende riba di tres dia di reunion pa tratamento di presupuesto 2018, caminda el a haci diferente pregunta riba e maneho di gobierno pa loke ta cultura.

“Un di e puntonan cu mi persona a haci pregunta riba dje durante tratamento di presupuesto 2018, ta e parti di nos cultura, con nos ta bay yuda aporta na desaroyo di nos cultura, mirando cu siguramente ta algo sumamente importante pa desaroyo di nos pais, pa identidad di  bo hendenan, pa crea un formacion social, pero tambe un ‘boost’ economico.

Den e contexto aki, mirando cu mi persona semper tabatin cultura na pecho y mirando cu diferente proyecto cu mi a aporta na dje  cu ya ta conoci atrabes di mi musica tambe, mi a dirigi algun pregunta na Minister di Cultura, riba e ramo di cultura, kico ta su vision pa desaroyo di  plan pa cultura con a yega na esaki pero tambe si e ta wak si cultura por ta un desaroyo economico pa nos isla si e por bira un pilar economico pa nos isla.

Mi ta kere cu desaroyo cultural atrobe ta un parti hopi importante y caminda e experencia di cultura pa cu turismo tambe ta hopi importante y mi a dirigi varios pregunta na minister relaciona cu esaki.

Un di e preguntanan tambe cu mi a haci ta relaciona cu den pasado un ex minister cu a bin c’un edificio di cosecha, y mi puntra si a haci un ‘research’ caba cuanto artesanonan ta haci uzo di e facilidad aki y kico ta e rekisitonan cu artesanonan forma parti di cosecha y na mes momento si minister ta carga e maneho aki tambe.

Mi  kere cu tur esakinan ta puntonan hopi importante y lo mi keda skerpi riba dje, analisa e contestanan cu lo wordo duna, pasobra cultura ta keda un parti importante di nos desaroyo y nos mester keda constantemente monitoria esaki pasobra cultura ta algo hopi dinamico y mester dun’e un direccion hopi concreto pa asina sigui desaroya nos dushi cultura, nos dushi Aruba,” Parlamentario Michael Lampe a mustra.