Ministerdi Husticia ta totalmente perdi, ningun hende sa di su paradero ta loke miembro di fraccion di AVP, sr Arthur Dowers a mustra den durante conferencia di prensa, mustrando cu esaki ta e persona cu a priminti pueblo, cu su persona lo bay soluciona tur problema di e pais pa loke ta trata siguridad.
Tur hende por a mira cu minister Bikker ta wordo confronta cu e puro berdad di loke ta responsabilidad como minister di husticia, mustrando cu e actual minister awor ta ripara cu ta facil pa papia sinta riba banki di oposicion, creando un esfera hopi negativo y hopi pesimista den e pais aki y crea tambe insiguridad cu tur loke su persona y hendenan di su partido tabata haci.
“Hasta noticianan cu nan tabata fabrica pa crea confusion den comunidad, awe minister Bikker ta sinta cu e realidad cu cual e ta wordo confronta cune.
Ta realmente hopi tristo cu e persona aki cu tur dia tabata papia di problema di crimen den e pais y cu e lo tin solucion, awe ningun hende por tende di dje of mira cualkier caminda, rato rato e ta Sali pa tira un cos culpando otro hende pero e mes ningun hende por mira cu e ta haci algo cu ta make sense.
Ta bon no recorda comunidad cu nos tin un minister cu ta sinta casi un aña, un minister di inhusticia ya cu mi no por yame otro cos, pasobra e minister aki su prome logronan den gobierno, tabata persecucion politico di hendenan drechi den e pais aki.
Esaki ta un minister cu den pasado a critica MEP severamente pasobra MEP tabata bula cabes di hende caminda hasta el a traha un grabacion cu ta bisa ‘bula nan cabes,’ y e prome cos cu el a haci ora cu el a drenta gobierno, ta di bula cabes di hende drechi kendenan tabata sirbi e pais aki pa bay dilanti y percura pa siguridad di nos hendenan.
Na di dos luga mi tin cu bisa cu el a persigui varios hende manera entre otro hefe di imigracion, hefe di guarda nos costa, caminda el a gaña riba nan y manda nan cas, kendenan ainda ta na cas cobrando sin cu nan por contribui na e trabou di desaroyo di e pais, y awor nos tin e siman aki atrobe a persigui varios trahado cu ta contribuyendo na siguridad di e pais aki.
E ta dedica su mes na persigui hende pero sin cumpli cu su promesanan na pueblo di a pais pa bin cu solucionnan pa siguridad di tur hende.
Nunca mi persona tabatin speransa cu e minister aki lo por a contribui cu algo pasobra ora cu tende e forma con e tabata argumenta con e ta kere cu siguridad tin cu cana y con su persona lo bay drecha siguridad den e pais aki, mi persona nunca a kere cu e minister aki lo por a logra algo pasobra e tabata bon cla pa mi persona, cu e minister aki no tin ningun conocemento di kico e trabao ta encera y e no tabatin un benul di con mester cana y con hinca cosnan den otro pa logra cierto metanan.
Mi a tuma nota di e rapport cu a bin riba e situacion na KIA, cu ta un rapport di Inspectie Gevangeniswezen di Hulanda, cu ta un inspeccion cu ta tuma luga periodicamente, y cu mi persona en cooperacion cu ministernan den Reino, e tempo ey a haci un esfuerso pa e tuma luga na diferente pais, cu ta tuna un bista critico riba funcionamento di e instituto y ta duna conseho riba kico por wordo haci.
Mi tin cu señala cu nos a laga un plan di maneho atras ora cu nos a bay for di gobierno, nos a laga un ‘inrichtingsplan’ nobo cu a tuma hopi aña y mi ta kere cu siguri 25 aña nos ta logra pone e plan aki den otro, lague cla pa ehecuta pero awor ya caba un aña a pasa y te na e momentonan aki e minister no por a termina cu e proceso aki caminda entre otro e trahadona por wordo ‘heringeschakeld’ pa na por bay traha na reorganisacion di esaki.
Ta algo di lamenta profundamente pero ya manera mi a señala caba, nos tin un minister di husticia cu su meta principal ta di persecucion politico, esey ta central, tin un director di KIA cu a bay parlamento y laga e situacion na KIA manera cu e ta aworaki y lamenctablemente no por mira cu e minister ta proactivo ni cu e tin e conocemento cu e tin hende rondona di dje cu tin e conocemento cu por atende cu e problemanan aki den un forma deligente,” Parlamentario Arthur Dowers a declara.
