Durante di e acto di huramento di e constelacion nobo di Parlamento despues di eleccion aña pasa, actual Prome Minister Evelyne Wever Croes a sigura pueblo di Aruba y tur autoridad presente na e acto ey, cu porfin pueblo di Aruba lo bay conoce un constelacion parlamentario di nivel.
Na mes momento e formado di e tempo ey a sigura cu Aruba lo conoce un parlamento mas atento pa defende interes di pueblo, un parlamento dirigi pa percura pa tin bon gobernacion y caba cu e fama di ‘stempelparlamento.’
Miembro di fraccion di AVP den Parlamento, sr Michael Lampe ta mustra cu di tur e bunita promesanan aki cu e actual Prome Minister a sigura pueblo, no a resta nada di esaki ya cu loke pueblo mes por a tuma nota di dje, ta cu e nivel a deteriora asina serio, cu practicamente no tin luga pa papia di respet y seriedad.
“Loke pueblo por a tuma nota, tanto durante reunionnan publico pa tratamento di presupuesto y awor pa trata e cambio di ley pa aprobacion di e ‘coalitieheffing’ ta cu mas cu nunca e palabra “stempel” ta un hecho, sigur ora cu miembronan di e tres fraccionnan cu ta sostene gobierno, no a haci e minimo esfuerso pa sikiera dirigi un pregunta riba e cambio di ley aki, cu lo bay afecta asina hopi hende aki na Aruba.
No tin seriedad, y claramente tur hende por a tuma nota cu 12 miembro di parlamento cu ta sostene gobierno, no a sirbi interes di pueblo, no a defende interes di pensionadonan of di esunnan cu entrada minimo.
A papia di algun gesto cu gobierno kier laga pasa como compensacion pero na momento c’un miembro di Parlamento ta dicidi di bay sostene un cambio di ley cu mester bay produci 130 miyon for di saco di pueblo, nos ta sigur cu pueblo a spera sikiera algun representante di pueblo haci un esfuerso pa mira con lo por alivia mas ainda e peso grandi cu gabinete Wever Croes ta bay impone riba pueblo.
Hopi gritamento, hopi insulto, hopi mentira sin sentido a bin dilanti, uza como argumentonan sin sentido cu no a sirbi ningun momento den defensa di e pueblo cu lo wordo confronta cu e aumento di BBO aki den lunanan cu ta nos dilanti.
No tabatin seriedad di parti di miembronan cu ta sostene gobierno y no tabatin respet pa nos pueblo cu awor despues di ocho aña, ta bolbe wordo confronta c’un aumento di BBP y BAZV cu mester duna gobierno espacio pa ehecuta su proyectonan segun Minister di Finansa, proyectonan cu ningun hende sa ainda kico nan ta.
Loke a tuma luga den Parlamento ningun momento tabatin algo di haber cu bon gobernacion, pio cu hisamento di nivel den discusionnan riba un ley di e magnitud aki pero al contrario a papia riba tur cos menos di e dolor di pueblo pa cu e ley aki.
E momento mas crucial cu a confirma e falta di seriedad y a demostra un mentalidad cu kisas no ta ni cuadra di un ‘speeltuin’ ta ora c’un miembro di RED a dicidi di entrega un amienda pa cambio di nomber di un ley, cu mester a carga e nomber di B=AVP pa supuestamente tur hende corda cu ta gobierno di AVP ta culpabel na esaki.
Un mentalidad infantil, un mentalidad cu ta bolbe confirma cu e expectativa cu Prome Minister tabata pensa ariba pa cu e hisamento di nivel den Parlamento, ta leu di bira realidad,” Parlamentario Michael Lampe a declara.
