21 di mei ta marca un fecha importante pa e Hala Hubenil di Partido di Pueblo Arubano (AVP), HAC. Pa prome biaha den historia HAC como e hala hubenil di e partido ta reanuda tareanan pafor di e temporada di ellecion y campaña electoral. Recientemente, durante e firmamento di e acuerdo di compromiso, Partido di Pueblo Arubano a reconoce e directiva nobo aki dunando e directiva e lus berde pa continua cu e tareanan otorga na e hala hubenil. E directiva nobo di HAC a percura pa presenta nan vision y tareanan pa termino largo y corto na e partido y su miembronan y a keda aproba pa asina HAC por cuminsa cu e trabownan necesario pa nos hubentud. HAC lo introduci differente plataforma cu e directiva y comisionnan lo haci uso di dje como guia pa differente area di interes pa nos hubentud y comunidad. E plataformanan aki lo atende cu temanan di Turismo, Educacion, Cultura, Medio Ambiente, Innovation, Deporte, Husticia, Salud, Social y Economia. Di e forma aki e directiva lo ta trahando tur dia incansablemente pa percura cu hobenan ta mas activo den nan manera di pensa y vocifera nan precupacionan, pero consciente di locual ta sucede den nan alrededor. Ademas e directiva lo sigui carga e principionan Christian-Democrata y tambe informa e pueblo hoben tocante e ultimo desaroyo den nos Politica. Semper ta sumamente importante pa e informacion corecto jega na e pueblo. Pa es rason HAC lo ta trahando cu demas fundacionnan, instancianan y tambe miembronan di e organo mas halto di nos pais, pa asina percura cu cada precupacion di nos hobennan y comunidad engeneral wordo treci dilanti den Parlamento di Aruba. Banda di esaki, HAC lo percura tambe pa actividadnan regular manera, workshops, evento, seminarionan etc. na unda cada hoben cu bira miembro of simplemente kier participa lo haña mas conocimento y asina sigui bira un hoben ehemplar pa nos comunidad.
E directiva di HAC, cu a tuma e curashi pa traha na bienestar di Aruba ta como lo siguiente;
- President di Hac; sr.Leonardo Figaroa y tambe secretario di asunto nan general
- Vice-Presidente di HACGiovany Villamizar y tambe Secretario di Asuntonan Social y Husticia
- Secretario di HACJonathan Garcia
- 2ndSecretaria di Hacy alaves Secretaria di Salud y Bienestar Jacely Mackintosh
- Tesorero di HACmjf Jessi Li
- 2ndTesorero di HACmjf Melanie Borre
- Presidente di Congresso y ademas Secretaria di Asuntonan Interno Kennylienne Ruiz
- Director di Communication sr Carlos Maduro.
- Consehera General mvr. Ichelle Simon
- Cantidato di HACMichael Lampe
E ocho hobenan aki lo tin e responsabilidad despues di e acuerdo pa traha na bienestar di cada hoben. Sigur di parti di e directiva completo nan ta sigura e pueblo di Aruba cu boso voz lo wordo scucha den e organonan mas halto, cu boso precupacionan lo wordo treci padilanti y cu HAC lo traha incansabelmente pa busca solucionnan na e obstaculonan presenta.
HAC ta un grupo di Hoben cu 1 vision y 1 mision; eleva e nivel di politica y participacion politico entre nos hobenan pa asina na mesun momento contribui na un desaroyo positivo di nos pais.
Si abo como hoben kier haci un differencia pa nos pais y su futuro, no duda di aserca cualkier miembro di e directiva di HAC pa asina abo tambe bira miembro di e hala hubenil di e partido y cuminsa haci un differencia pa nos hobennan.
