Na momento cu gobierno a presenta su boletin extra siman pasa diabierna, e pensamento di fraccion di AVP tabata cu gobierno lo anuncia cu lo anula e pakete di medida cu e tin intencion di impone riba pueblo di Aruba pero a bin resulta cu esaki tabata anuncia cu nan a bay di acuerdo cu exigencianan di CAFT cu ya anteriormente miembronan di fraccion di AVP a bin ta trece dilanti for di momento cu a trata presupuesto 2018 den Parlamento.
Lider di fraccion di AVP, sr Malon Sneek a mustra cu for di inicio caba a ser mustra cu e presupuesto 2018 lo no carga cu aprobacion di CFT ya cu e tabata contene un cantidad di aspectonan cu no ta cuadra pero awor por mira con fraccion di MEP cu tur nan observacionnan di ‘inacceptabel’ pero awe CAFT ta mustra fraccion di MEP cu nan ta para riba e aprobacion di e tres fraccionnan cu ta sostene gobierno y a bisa cu un presupuesto supletorio ta na caminda pa bolbe wordo trata pa parlamento dentro di poco.
“En realidad e mensahe di CAFT na e tres fraccionnan den parlamento ta cu nan tin cu cambia presupuesto 2018 ya cu e no ta bon y no ta sirbi y esaki ta di lamenta pasobra gobierno por a haci e tarea manera mester ta y manera cu miembronan di fraccion di AVP a bisa, cu e gastonan cu tin presupuesta riba personal,ta gastonan cu lo keda subi y cu esaki no ta cuadra cu acuerdonan cu a wordo haci y ta wordo haci.
Locual sigur a hala nos atencion ta cu despues cu nos a tuma nota di e comunicado di prensa emiti pa CAFT, ta bisa bon cla cu e gobierno aki mester bay baha 12 miyon florin di presupuesto pa loke ta trata personal pa e presupuesto 2018.
No ta Marlon Sneek ta bisa esaki pero CAFT ta bisa bon cla: “relaciona cu gastonan di personal, gobierno di Aruba a presenta un plan di personal den e documento di FEM, cu ta su plan total, den cual gobierno tin como meta pa dentro di añanan, percura pa reduci gastonan di pesonal, esta cu mester baha esaki durante añanan cu ta bin.”
Un parti importante cu e comunidado di CAFT ta mustra tambe y cu ta hopi importante, ta mustra lo siguiente: “pa 2018 gobierno lo tuma medida cu mester reduci gasto di personal cu 12 miyon florin.”
Pues pa e 6 luna nos dilanti, gobierno mester baha gasto di personal cu no menos cu 12 miyon florin y nos por a scucha prome minister algun siman pasa, como anticipacion di loke CAFT lo trece dilanti el a trata di suavisa esaki, bisando entre otro cu su gobierno a entrega plan pa baha gasto di personal bisando: “lo no mishi cu salario ni beneficio di empleadonan publico,’ esaki el a bisa algun siman pasa y cu a keda publica den medionan di comunicion y awor cu el a priminti CAFT cu e mester baha esaki, awor e mesun prome minister ta traha un comunicado di preensa y ta declara cu “minister presidente ta desmenti cu tin retiro di 300 ambtenaar,”
Awor e ta bisa cu e no ta bay kita ningun beneficio, e no ta bay kita nada, e no ta bay kita ambtenaar pero e ora splica con e ta bay baha gasto di personal cu 12 miyon florin aki?
Ta ken minister presidente kier tuma haci, anto esaki ta pasa ora cu bo ta gaña di mas ya cu ora e ta gaña, e ta lubida kico el a bisa algun siman atras, el a declara cu e ta bay respeta tur locual empleadonan publico tin como derecho, ta pone cu e unico caminda cu ta keda ta di manda hende cas.
Esaki ya nos a scucha na Hulanda caba ora cu nos a atende e reunionnan di IPKO, cu ta hende lo wordo manda cas pero e minister presidente no tin e curashi pa bisa esaki,” lider di fraccion Marlon Sneek a mustra.
