fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

Partido AVP ta organisando reunionnan informativo, un di nan tabata e exitoso reunion na San Nicolas c’un atendencia hopi grandi  y e serie di reunionnan a continua diamars na edificio di MFA na Noord. Meta di e reunionnan aki ta pa informa pueblo riba e efecto di tsunami di medidanan cu ta na caminda y cu lo drenta na vigor dia prome di juli, Parlamentario Richard Arends a splica.

“Aki no ta solamente e BBO y BAZV, cu ta meramente pa financia e aumento gastonan excesivo di gobierno compara cu realisacion di aña 2017,manera cu nos y CAFT a bin ta señala.

Ademas e aumento di impuesto riba cada schakel den e cadena di consumo — entre e importado, e mayorista, e detayista y e consumidor – mester tene cuenta cu  e ampliacion di e base di BBO y BAZV tambe. Producto- y servicionan cu antes no tabata paga BBO riba nan, awor tin cu bay paga BBO riba esakinan.  Solamente na servicionan bancario, nos ta papia aki di un peso adicional di 10 miyon di florin. Ademas di e 150 miyon cu e aumento di BBO y BAZV  lo genera for di economia, mester conta un minimo di 10 miyon adicional pa servicionan cu banconan comercial ta presta. Ainda nos no ta tuma na cuenta loke companianan di seguro y e ‘cost of doing business’ den cada schakel ta bay aumenta tambe. Mester tene na cuenta tambe e aumento di accijns riba gasolin cu Gobierno a presupuesta.

Si tuma na consideracion cu 99% di productonan cu nos ta consumi aki na Aruba ta importa y mester pa cumpra esakinan na dollar p.e. pa trece nan Aruba, e ampliacion di e base di BBO t BAZV lo tin su efecto. Importacion riba su mes ta bay ta mas caro pa motibo cu e gastonan bancario cu antes no tabata paga BBO riba nan, ta bay conoce un aumento di un tarifa di cero pa 6%. E reaccionnan di e.o. Aruba Bankers Association ta confirma cu gobierno a pasa un ley ciegamente, sin consulta, sin ningun analisis. Ora cu gobierno ta splica cu e efecto aumento di  BBO lo ta di 3.4% anualmente, ningun hende ta kere esaki. Si nos wak bon, awe tin tur componente mescos cu na 2007, unda cu no tabatin un crecemento economico, aumento di impuesto  y sin lubida e aumento di prijs di combustibel a rais di desaroyonan internacional, pues tres factor identico na dies aña pasa, cu lo por conduci siguramente na un tasa di inflacion hopi halto cu e 3.4% cu Gobierno a indica.

E medidanan cu lo drenta na vigor no tabatin un compensacion debido. Mas di 10 mil pensionado lo perde nan reparatietoeslag, bou di pretexto cu nan lo haya un reduccion di prima di AZV caminda a resulta cu nan mes lo paga pa e reduccion aki dor di eliminacion di e reparatietoeslag. Tambe e empresario chikito, e trahado independiente, esunnan den industria creativo, tampoco ta wordo compensa debidamente y esaki nos ta lamenta ya cu aumento y ampliacion di e impuesto aki, no solamente ta afecta e clima di inversion pero tambe ta aumenta e ‘cost of doing business’ aki na Aruba.