Lider di partido AVP, mr Mike Eman a haci otro revelacion di cifranan cu Gobierno di Aruba, Gabinete Wever Croes, a mantene secreto pa pueblo di Aruba y ta trata aki di cifranan di un rapport di Oficina Central di Estadistica.
“Gobierno y esunnan cu ta sostene Gobierno tin un silencio hermetico riba e cifranan aki. Ta trata di cifranan sumamente preocupante,” Eman a bisa.
E lider di AVP a mustra cu despues cu dos siman pasa a revela cifranan di Banco Central di Aruba su encuesta bou comerciantenan y cu ta mustra con e economia di pais Aruba ta bayendo den direccion robes, awo ta revela con e poder di compra di ciudadanonan ta wordo afecta.
”Atrobe, no ta Mike Eman ta bisa esaki ni AVP, pero ta Oficina Central di Estadistica ta bisando kico ta pasando cu e poder di compra di nos ciudadanonan cu na e momentonan aki ta trancando Aruba su economia.
E ta afectando severamente e poder di compra di nos ciudadanonan y poco poco un empobrecimento hopi grave den nos comunidad.”
E cifranan di Oficina Central di Estadistica ta cuadra cu e cifranan presenta door di Banco Central di Aruba. E survey di BCA ta mustra riba un caida grandi den e percepcion economico y desaroyo di pais Aruba; un caida den e resultadonan economico di comercio general na Aruba; un caida grandi den e confiansa di futuro economico; caida den inversionnan planea; e sentimento di desconfiansa lo sigui den futuro; inversion a cai y e cifranan lo no bira miho tampoco.
E cifranan di CBS ta indica cu e inflacion di Aruba ta bayendo direccion di dobel cifra. Esaki ta nifica cu e inflacion por desaroya den algo negativo debi na e impacto di e pakete di medidanan cu a wordo introduci dia prome di juli 2018.
E cifra aki, Eman ta bisa, ta mustra con alarmante e situacion ta.
Ora tuma e cifra di juli 2017 compara cu juli 2018 ta mira cu esaki ta awor 5% y tabata -1.1%, esey kiermen un aumento di 6% di juli pa juli.
“E situacion aki ta bira ainda mas preocupante,” segun e lider di AVP, pasobra si mira no solamente e diferencia entre 2017 y 2018, pero si mira na unda e diferente cambionan ta, ta constata cu no solamente ta experencia un desaroyo negativo di 6%, pero hopi di nos hendenan ta experiencia un inflacion actualmente cu ta core rond di 10% den cuminda y gastonan y transporte.
Eman a bisa cu ta conclui esaki pasobra si analisa e cifranan separa di e dos entidadnan aki, ta mira cu pa sector, por ehempel “food”, esaki no a subi cu 5 pero 9.8% segun datonan suministra pa CBS. Esaki ta nifica cu di cada 100 florin, a bay atras cu 10 florin.
“Esaki ta e realidad cu nos hendenan ta confrontando y esaki ta cifranan cu nos no ta tende e gobernantenan ta papia di dje. Nan ta tene conferencia di prensa pero nos no ta tende di e cifranan di BCA ni di CBS,” lider di AVP mr Mike Eman a mustra.
