E hecho cu Minister di Husticia Andin Bikker a declara recientemente cu e ta bay Parlamento pa pidi mas placa pa husticia pa combati criminalidad, tin Parlamentario Robert Candelaria asombra. 

Motibo di esaki ta pasobra durante tratamento di presupuesto el a cuestiona e hecho cu e mesun gobierno di  Minister Bikker, a baha e presupuesto di husticia.

Candelaria ta mustra cu e ta corda ainda con algun luna atras el a puntra Minister di Husticia con e ta baha “overtime” cu algo mas di 4 miyon florin compara cu e presupuesto di e aña prome, mientras cu na mesun momento ta priminti di pone mas polis den atraco team, den Jeugd en zedenpolitie y barrio-regiseurs mientras cu no ta pone mas placa pa e post di husticia. Na mes momento su gobierno a dicidi di baha e “wervingskosten” pa polis nobo tambe cu 50%.

“Con por ta posibel bo por kere cu bo ta baha bo presupuesto cu 4 miyon sin corta bo nanishi daña bo cara. Nos a puntra tambe ki garantia e ta duna cu loke e tabata haciendo, no tabata pa haci e presupuesto mustra bunita, cu a bahe, pero cu despues mester bolbe Parlamento pidi pa subi’e,” Candelaria a bisa. 

E Parlamentario ta bisa cu awe e y otronan den Parlamento cu a cuestiona esaki ta hayando razon. Tabata visibel cu loke e Minister a haci no tabata posibel. E no a haci’e riba hechonan logico, pa cual awo e mester bolbe Parlamento pa pidi un aumento di placa pa presupuesto di Husticia. 

E hecho di e situacion na Venezuela cu personanan ta tratando di drenta Aruba ilegal, casonan di atraco cu ta lantando cabes ta haci cu mester pone polisnan traha mas “overtime”. Banda di esaki, tin un klas hopi chikito ta cuminsa e aña’ki, cual ta debi cu no a pone suficiente fondo disponibel. 

Tambe Parlamentario Robert Candelaria a bisa cu su deseo ta pa Cuerpo Policial tin tur loke ta necesario pa e por funciona (draai) bon, pasobra aworaki apesar di e situacion, tin un trabou bon ta tumando luga, iniciativa cu e departamentonan mes ta tumando luga, manera control grandi di trafico dunando un sentido di siguridad na e pueblo, pero esaki ta bay tambe man den man cu un bon planeamento y “overtime”. 

“Hamas y nunca mi lo bay sinta y stroba un trabou cu ta satisfactorio pa pueblo y cu ta bon pa e organisacion. Pero mi ta haya si cu e vision y maneho cu un Minister bini cun’e, mester ta realistico y esey nos no ta mirando,” Parlamentario pa fraccion di AVP a mustra.

HELICOPTER

Candelaria a expresa tambe cu e ta pro helicopter, cual proyecto recientemente a bay destaho publico. Sinembargo, “un florin bo por sake un biaha so. E choice cu e Minister mester haci ta wak si e florin ey ta miho gasta na un helicopter y no na algo otro, por ehempel mas personal y otro material.” 

El a splica cu e uzo di un helicopter ta limita na planning y tempo, mientras su gastonan ta hopi halto. “Mi a cuestiona si esaki ta e forma mas eficiente di gasta un florin. Mi a haci pregunta den pasado cuanto casonan pisa helicopter a logra yuda soluciona di biaha of despues. Mi no ta contra, pasobra mas hopi instrumento cu polis tin pa yuda un Aruba mas ‘safe,” mi ta na fabor di esey. Pero e florin ey ta un biaha so bo por gaste y mester hacie di e forma mas sabi posibel cu ta na beneficio di comunidad y Cuerpo Policial.” 

Un posibel solucion ta “drones”  cu ta di uso profesional cu por haci hopi cun’e y loke cu por spaar entre e dos productonan aki ta basta hopi y cual por wordo uza por ehempel pa polisnan tin acceso na informacion digital di diferente databases den nan auto, cu ta haci nan trabou hopi mas sigur y eficiente. 

E ta haya cu a scoge hopi facil pa un solucion cu ta costa hopi placa y su rendemento no ta di e halto ey, siendo cu tabatin otro opcionnan.