Parlamentario di AVP Benny Sevinger a cuestiona con e Ni e Parlamentarionan a haya bon informacion di kico tabata idea pa cu e reunion aki.
E encuentro a cuminsa den oranan di merdia y a wordo describi como un “intercambio di pensamento” cu director di Hospital; Hunta di Supervision; SOGA y AIB riba e situacion peligroso cu a surgi rond di e trabounan di renobacion y ampliacion di e instituto di cuido.
Na inicio di e reunion apenas, segun Sevinger, e Presidente di Parlamento a anuncia cu e encuentro ta pa haya informacion. “Pa informacion ta den un otro tipo di reunion mester busca esaki pero no den uno publico manera nan tabata pretende di hacie.”
Mirando e preguntanan di e Parlamentarionan cu ta sostene Gobierno, no tabatin nada otro cu trata di trece un discordia entre hospital y SOGA, cual, segun Sevinger, no a logra. E preguntanan ademas no tabata na nan luga. Esun responsabel pa e proyecto tabata e Minister, pero e mes no tabata presente. AVP a haya algun informacion den e reunion aki, cu lo sigui diamars. Asina por ehempel den e reunionnan cu mester stipula kende ta carga responsabilidad pa cada cos den e proyecto aki, e Gobierno no ta acudi ni a manda representante. “Pues pa lunanan largo caba e Gobierno no ta tuma su responsabilidad den e proyecto aki cu tur e consecuencianan cu esaki por trece cun’e. Minister no conoce kende ta Arellano, ya cu e ultimo aki mes a bisa cu e no conoce e mandatario. No tin atencion pa un proyecto di e magnitud aki, simplemente pasobra e minister ta prensa cu si e proyecto aki fracasa, e ta culpa di AVP of di Mike Eman. E proyecto aki ta uno di Aruba. E hospital aki a wordo traha na 1972 y el a yega na su punto cu e no por wanta mas. No ta pornada e proyecto aki a bini cu tur su retonan cu e tin, pasobra ta un hospital tin. Mester traha ampliacion, cu tur e funcionalidad cu e tin awo pa atende e pueblo di Aruba. Esey ta e retonan cu lo keda y e prome yama pa soluciona nan ta e Minister. Si e no ta interesa, ta pensa riba corupcion so, si e no kier sinta na mesa cu ningun hende, e ora e problemanan lo sigui.”
E Parlamentario di otro banda ta contento di a tende si for di SOGA y Hospital, cu nan ta determina pa finalisa e proyecto. E ta importante, segun Sevinger, pasobra e ta un proyecto cu ta na beneficio di pueblo. “E proyecto aki ta bay caba y na final nos tin un hospital cu nos tur por ta orguyoso di dje.”
