Depositando su confianza den e talento hoben di nos isla, Mike Eman a acepta inmediatamente e oferta haci dor di e popular cantante, songwriter y productor Jonathan Thiel miho conoci como ‘Biggy Boy’ pa traha un jingle pw’e y partido AVP.

Diaranson atardi Eman a bishita e studio di grabacion caminda ambos a combersa riba ideanan nobo. E lider di Partido di Pueblo Arubano, por a tende con e tema ta kedando y el a keda masha entusiasma.

Di su parti, Thiel a splica cu e jingle su concepto ta mas bien basa riba un improvisacion cu el a haci algun tempo atras na un evento di partido berde cu a cay den hopi bon tera cerca e simpatizantenan.

“E ta un jingle cu soca y ritmo combina. Ta un concepto cu mi a saca di un biaha cu mi a presenta cu mi banda na un evento di AVP.  E publico a gusta esaki y nos a pensa pa traha un casi mescos. Asina mi por a traha riba algo great.,” e popular cantante hoben a splica.

Tambe el a bisa cu e jingle, cu ta bay wordo lansa pronto, ta uno hopi ‘catchy,’ kier men cu ta facil pa cant’e den coro. “Y ta letranan cu mi a usa ora cu mi a canta e jingle aki live.” Biggy Boy a bisa cu e mes a skirbi, graba, produci y tur cos di e jingle.

Mirando e talento y exito di tur e produccionnan di e hoben aki, lider di AVP no tin duda cu en berdad e ta algo hopi bon y cu tur hende ta bay disfruta hopi di dje durante e ultimo simannan di campaña y den futuro. Lider di AVP Mike Eman den nomber di su partido ta gradici Biggy Boy pa pone su talento traha na fabor di partido.