Recientemente un grupo grandi di persona interesa den vision y plan di candidato Benny Sevinger a bini hunto durante un reunion di contacto teni na Playa. Aki, e candidato number dos riba lista di Partido di Pueblo Arubano a papia, splica y interactua cu ciudadanonan den un ambiente masha agradabel.

E anochi tabatin como anfitrion famia Curie den Caya Ernesto Petronia, kendenan ta deposita nan confianza pleno den e bon trabou cu Benny Sevinger ta haciendo y ta dispuesto pa sigui haci na beneficio di henter e pueblo di Aruba. Presente tambe tabata otro miembronan di e ekipo strategico pa duna splicacion detaya riba e diferente terenonan cu Sevinger ta traha.

E reunion di contacto riba nivel informativo a comparti cu tur esnan presente e avancenan realisa dor di e candidato den su funcion como Minister di Integracion, Infrastructura y Medio Ambiente. Tambe por a tende for di Sevinger mes kico ta su vision pa futuro. E candidato a sintie honra pa e presencia di tur esnan cu a atende invitacion di e anochi aki y ta gradici nan pa e atencion duna.

E ta combenci cu tipo di encuentronan manera esaki, ademas di informa y kita duda, tambe ta sirbi como oportunidad pa crea plannan nobo y adapta otronan existente pa ta mas den liña cu loke pueblo kier mira y kico por haci.