ORANJESTAD  – Diabierna anochi AVP un biaha mas a celebra cu pueblo apertura di un otro oficina di partido y inicio di campaña di candidato Benny Sevinger. E politico a bisa cu e oficina mes nunca a cera su portanan desde e campaña anterior.

For di tempran caba por a sinti un ambiente di alegria. Simpatisantenan di Benny Sevinger y di partido AVP a yega na cantidad na e oficina situa den Rancho.

E politico di AVP a keda masha contento pasobra por a nota cu esnan presente den su gran mayoria tabata su hendenan di bario, cu semper bay a keda sostene.

E amor cu nan ta sinti pa e politico aki, kende tabata alumno di Watty Vos (dfm) ta grandi.

Apertura di oficina di Sevinger tabata un celebracion di e compromiso di un Bon Trabou haci door di e partido, na cual e ta pertenece, den gobernacion, y e compromiso pa sigui cu loke falta ainda.

Sevinger a yega canando for di Cas di Partido Playa compaña pa su señora esposa y Prome Minister Mike Eman. Ambos politico a wordo ricibi cu brasa y sunchi y cada bes tabata haya e siguransa for di e publico cu nan ta contento di a apoya e partido den pasado y lo sigui duna e apoyo aki.

Den e periodo aki di Gobernacion di AVP cu ta finalisando, Aruba su infrastructura a wordo mehora grandemente. Manera e comentario ta wordo haci “AVP y Mike Eman ta e arkitectonan di e Aruba nobo”.