Durante conferencia di prensa dialuna 28 di mei 2018 lider di Partido di Pueblo, AVP, y ex ministro presidente di Aruba, sr. Mike Eman, a duna di conoce cu e prome parti di e curso di formacion politico tocante Nos Constitucion y Systema Parlamentario tabata un gran exito. Cincuenta persona a inscribi pa e curso aki y durante e reunionnan tabata tin un promedio di setenta pa ochenta persona presente.
‘Basiscursus Politieke Vorming’ tin como meta e formacion politico di tur cu ta desea di duna un contribucion na e causa publico y cu ta desea di prepara su mes pa un carera politico. E cursistanan tin diferente ‘background’ y diferente nivel di educacion y hasta tin cursistanan cu ta miembro di otro partidonan politico cu ta participa activamente na e curso.
E curso ta wordo duna durante cinco siman consecutivo riba diahuebs di 7’or pa 9’or di anochi. Mr. dr. Ryçond Santos do Nascimento, kende ta experto riba e tereno di derecho constitucional, ta encarga cu e lesnan na Cas di Partido di AVP na Oranjestad. Diahuebs 31 mei 2018 tabata e ultimo encuentro di e prome parti di e curso.
Docente, Ryçond Santos do Nascimento, ta sumamente contento cu e atendencia y participacion activo di e cursistanan. Doctor Santos do Nascimento ta duna di conoce cu e material di e curso a wordo trata intensivamente cu hopi pregunta y observacionnan di e cursistanan.
Esaki ta un indicacion cu e curso ta satisface un necesidad den nos comunidad. E preguntanan tambe ta indica cu e participantenan ta desea mas informacion y ta desea di capacita nan mes pa contribui na e causa publico. Santos do Nascimento ta splica cu e ta desea di duna su aporte na e comunidad di Aruba pa medio di educacion y conseho experto.
Ta pesey e ta contento cu diferente gobernante y lider den comunidad ta haci un apelacion riba su conocemento y experticio.
E ta particularmente contento cu e oportunidad y plataforma cu AVP ta brind’e pa trece e mensahe cu hunto nos por hisa e nivel di politica na Aruba. Esey ta hustamente e mensahe cu Fundacion Formacion Politico Digna Laclé-Herrera kier trece na e comunidad Arubiano.
Pa tal motibo e lema di e curso di formacion politico, expresa na Hulandes, ta: “Ambieer niet een functie, maar de kennis om die functie te kunnen vervullen”.
Partido di Pueblo, AVP, y Fundacion Formacion Politico Digna Laclé-Herrera ta anuncia e di dos parti di e curso di formacion politico, cu lo cuminsa dia 7 di juni.
Durante e curso nobo aki lo trata dos tema sumamente importante pa e estado di derecho democratico: derechonan fundamental y e poder hudicial.
E curso aki tambe lo tuma luga riba diahuebs di 7’or pa 9’or di anochi na Cas di Partido di AVP na Oranjestad.
Docentenan di e di dos curso aki lo ta mr. dr. Ryçond Santos do Nascimento y mr. dr. Viola Van Bogaert. Idioma di instruccion lo ta Hulandes.
