Na mes momento cu parlamento a aproba e ley di ‘coalitieheffing’ rancando un suma di 130 miyon for di saco di pueblo, Minister Oduber ta confirma cu Serlimar lo muda for di su edificio na San Nicolas, pa un edificio na Pos Chikito caminda antes tabata keur auto.
Bou di varios gobierno di pais Aruba a conoce, Serlimar tabata ubica na San Nicolas y nunca a confronta problema cu e edificio, al contrario e edificio a pasa den diferente cambio, diferente renobacion y expansion, lider di fraccion di AVP, Marlon Sneek ta mustra.
“Nos mester pone enfasis riba e hecho cu gobierno no tabatin gasto di pago di huur di e edificio na San Nicolas ya cu e tabata propiedad di gobierno y na momento cu mester a mantene e edificio of drecha esaki, e costo no tabata halto.
Sinembargo pa acomoda sponsor di campaña, cu awor kier mira nan recompensa drenta bek den nan caha di placa, gobierno ta tuma e decision pa muda Serlimar for di un edificio cu no tin gasto pa gobierno, pa un edificio na Pos Chikito cu lo bay costa na huur e suma di 50 mil florin pa luna mas 10 mil florin na gasto di awa y coriente.
Esaki ta nifica cu den un aña di tempo e sponsor di campaña aki lo strica e suma di 600 mil florin y si e contract aki tin duracion di 4 aña esaki ta nifica cu e amigo y sponsor di minister lo strica e suma di 2.4 miyon florin mientras cu pueblo ta wordo confronta c’un pakete di medida cu lo tin cu produci casi 150 miyon pa gobierno pa aña.
Esaki sin conta e aumento di 2 cen di accijns riba gasolin cu gobierno a introduci na algun siman atras cu tambe pueblo tin cu paga y cu mester produci e suma di 10 miyon adicional.
Pues aki ta otro prueba un biaha mas cu e politica di sirbi interes di amigo, famia y sponsor, ta esencial y primordial pa e gobierno aki mientras cu pueblo no ta bin na remarca na e momentonan aki cerca gobierno cu simplemente nunca a sirbi interes di pueblo.
E solo hecho cu ningun miembro di e tres fraccionnan cu ta sostene gobierno actual no a emiti un solo pregunta den defensa di pueblo ora cu Parlamento a trata e cambio di ley di coalitieheffing cu ta destina pa saca casi 150 miyon for di cartera di pueblo sin cu nos hendenan ta haya algo bek a cambio di e abuso aki di parti di gobierno.
Ya caba Minister di Finansa a confirma durante tratamento di e ley di coalitieheffing siman pasa, cu e bunita promesa di Evelyne Wever Croes cu su gobierno a percura pa pensionadonan haya un reduccion den pago di prima di AZV di 2% no ta beneficia e pensionadonan ya cu ta algo cu ta SVB ta paga pero den e proceso aki e pensionadonan aki lo no haya e reparatietoeslag mas cu ta otro engaño grandi di gabinete Wever Croes.
Manera nos a bin ta bisa na varios ocasion ya ta dificil pa gobierno sconde cosnan pa pueblo ya cu awor cu tin Nicolas,” lider di fraccion Marlon Sneek ta mustra.
