Danki di curazon pa guia nos y hopi bendicion pa sigui hopi aña mas
ORANJESTAD – Poniendo manera semper e hende y pueblo na prome lugar, partido AVP no tabata kier pa e evento di diabierna ultimo pasa simplemente como apertura di sede di candidato Benny Sevinger. Pesey mes a probecha di e oportunidad tambe pa duna un merecido reconocemento y danki na figuranan cu pa decadanan largo a sostene no solamente Partido di Pueblo Arubano AVP, pero tambe e bario di Rancho. Na e momento estelar di e anochi a duna un homenahe na 10 baluarte di partido y na cada un a haci entrega di un plakkaat den nomber di AVP como muestra di aprecio y gratitud. Cada un a keda presenta y entrega dor di Sevinger mes of dor di lider di partido, Mike Eman.
A scoge e biaha aki 10 persona, di e diferente residentenan di Rancho cu semper a duna sosten grandi na partido AVP. Manera candidato Sevinger a menciona “Tur e personanan aki, a guia e partido aki, a para, a cose flanel, a cose bandera, a inspira e hobennan cu a drenta política pa cana den e caminda aki.”
Esun prome cu a yama pa dilanti pa ricibi su reconocemento ta Sr. Francisco S. ‘Tinchi’ Vos, kende a keda describi dor di Benny Sevinger como un luchado, un hende cu a para banda di su ruman y cu a sacrifica pa su ruman, defunto candidato di AVP y Minister Watty Vos (dnp). “Na momento cu Watty a bay laga nos, Tinchi ta esun cu a guia nos durante ultimo ananan y ora di momentonan dificil, Tinchi tabata pasa na cas y bisa nos pa “sigui padilanti.” Sevinger a recorda. Pa e motibo aki y mas, partido AVP ta gradici Tinchi pa su guia y hunto cu esey tambe e peticion pa e sigui guia nan riba e bon caminda.
Siguiente baluarte di e anochi tabata Sra. Silvia ‘Chiba’ Dirksz. Un figura masha conoci di e bario, kende su raisnan den Rancho ta hopi profundo. Sr. Sevinger a conta e publico grandi cu a reuni diabierna anochi, cu den momentonan dificil partido a mantene su luchadornan y su hendenan di idealismo grandi, entre nan Sra. Chiba. Su mes no por tabata presente pa motibo di kebrante di salud, pero semper el a demostra su amor y sosten pa partido AVP.
Despues a sigui dos hende muhe mas cu a keda reconoci como baluarte. Ta trata di Sra. Maria A. Palm, miho conoci como ‘Madora’ y tambe Sra. Maria A. Ridderstap. Lider di Partido Mike Eman a referi su mes cu hopi elogio na Sra. Ridderstap, indicando cu for di su cas na Guatemalastraat, e ta un di e palancanan di mas grandi. Otro dama cu ta traha duro pa partido semper ta Sra. Julieta ‘Mama Giant’ Tromp kende tambe a haya su reconocemento.
Bayendo bek na e cabayeronan, a reconoce Sr. Alicio Quandt mescos cu Sr. Pedro H. ‘Lati’ Reyes. E ultimo aki ta un baluarte di Rancho cu a para cu e partido aki pa hopi aña y ta sigui den e lucha. Benny Sevinger a bisa cu e plakkaat cu e ta ricibi for di partido e anochi aki ta simpelmente “un reconocemento pa e trabou duro durante tur e añanan aki a haci pa AVP y pa e bario di Rancho. Sin duda cu gratitud y honor pa nos por duna un reconocemento aunke ta chikito.”
Otro persona cu lamentablemente no por tabata presente pa motibo di salud, pero cu for di su cas den cercania tabata scuchando tur cos y siguiendo e acontecimentonan, ta Sr. Victor ‘Toy’ Hoek. Dos miembro di su famia a represent’e y acepta e reconocemento. Benny a expresa cu den nomber di AVP kier a reconoce e gran trabou cu Toy a bin ta haci pa partido y specialmente pa e bario di Rancho. “Y nos kier pa e sa cu nos tey y cu e ta den nos pensamento. Nos ta pasa bishit’e pa e sigui guia nos. Nos ta dese’e hopi bida y salud pa e sigui cu nos aki den Rancho.”
Por ultimo a toca turno na Sr. Hubert ‘Porois’ Tromp y Sr. Edward A. ‘Etty’ Toppenberg, un fuerte baluarte di Companashi, di Rancho y di Aruba henter segun Sevinger, mientras cu lider di partido a elabora mas riba loke Sr. Toppenberg ta inspira den pueblo. Eman a bisa cu “ora cu e persona aki laga su bos y su guitara resona den e pueblo, bo ta sinti un ambiente grandi di union.” Eman a conta con den e biahanan cu tabatin oportunidad di comparti celebracion di Arubadag hunto na Hulanda, e por ripara con Arubianonan ta haya lagrima na nan wowo ora nan scucha e bos y guitara di Etty Toppenberg.
Eman y Sevinger, compaña pa tur otro candidata riba scenario, a keda hopi complace di a tuma e tempo pa reconoce e baluartenan aki. “Hopi di nan no por ta presente pa motibo di salud, pero nos no ta lubida riba nan,” Sevinger a bisa. Prome cu a conclui e anochi y e serie di reconocemento, Benny Sevinger, a haci mencion di varios otro persona cu tambe ta aporta enormemente na e avance di partido y ta personanan masha stima den seno di AVP y den seno di Rancho. Ta trata di Sra. Fridolina, Sra. Elma Vos, Sra. Irma, Sra. Yolanda Fingal y Sra. Nadijs Reyes. “Di curazon, den nomber di partido AVP danki na bosonan, danki pa e sosten. Laga nos keda guia e pais aki. Masha danki y cu Dios bendiciona bosonan pa ta cu nos hopi aña mas,” Benny Sevinger a finalisa bisando.
