Benny Sevinger na apertura di su sede na Rancho:
“Boso ta e guia y nos ta ehecuta; esey ta e manera cu democracia ta trahando na Aruba awo”
ORANJESTAD – Color berde a inunda Avenida Alo Tromp diabierna anochi na momento cu lider, candidatanan y simpatizantenan di Partido di Pueblo Arubano, AVP a celebra hunto cu colega y amigo candidato Benny Sevinger, e apertura di su oficina na skina di e caya aki cu Weststraat. Sevinger a marca e anochi aki realisando un reconocemento na 10 baluarte di e bario di Rancho, y hunto cu Mike Eman y otro candidatonan a confirma su compromiso cu pueblo di Aruba pa sigui traha y haci un Bon Trabou.
Den su palabranan, Sevinger a cuminsa na recorda con 12 aña pasa, ora cu e oficina a habri pa prome biaha. E ocasion tabata uno dushi pero tambe poco marga, ya cu a tuma e batuta y e trabou over di un lider grandi cu a bay laga nos. Sr. Watty Vos, (dnp) a bisa nos “Esaki ta e caminda cu boso mester cana. Mi ta eyriba y mi ta guia boso,” Sevinger a bisa e grupo di miles di sostenedor cu diabierna anochi a bin pa comparti. E candidato a sigui menciona, cu di mes manera a bini hunto ocho aña pasa y despues cuater aña pasa. “Nos a para akinan y nos a cana hunto.”
E candidato a tuma e oportunidad pa yama danki na prome luga Dios pa tur su bendicionnan y guia, na lider di partido Mike Eman cu ta guia y pusha, na e bario di Rancho cu semper ta yuda, pero sigur tambe na su casa y yiunan cu ta wak’e djis un rato mainta, pero tin comprension cu e ta trahando pa futuro di henter un pueblo y di tur e yiunan di Aruba. “Cu hopi humildad y gratitud nos ta para boso dilanti pa hunto sigui cu e compromiso,” Sevinger a bisa cu emocion.
“Den tur skina di Aruba nos a cana; di San NIcolas pa Madiki, di Madiki pa Santa Cruz. Nos a cana pa sinti e dolor di e pueblo, pa sinti e necesidad di e pueblo. Nos a bisa ta basta! Basta cu un gobierno cu solamente un grupo tabata biba di dje, cu e placa di pueblo tabata bay den un solo direccion. Awe nos ta para aki paso nos ta duna cuenta cu placa ta bay pa pueblo, pa nos yiunan!”
Pero esey no tabata tur. E candidato di partido AVP y Minister di Integracion, Infrastructura y Medio Ambiente a reconfirma su compromiso bisando “Ainda falta. E trabou ta duro y e trabou ta grandi. Nos tin un ekipo cu mi ta orguyoso di ta forma parti di dje. Tur a aporta durante ultimo 4 aña. E no tabata facil, nos a traha duro y awe nos por duna boso e confianza, cu hunto nos ta sigui.” E ta duna hopi credito na vision y guia di lider di partido y Prome Minister Mike Eman. “Nos a wak kico a pasa den cuater aña, nos a wak unda e placa a bay. Nos ta mirando e barionan cu mester pone luz ainda, e centro di ciudad cu tabata bandona awo tin klinkers y tram. Awe tin prosperidad, awe nos ta mira e progreso. Hunto nos a traha pa e cambio, pero ainda falta. Laga nos sali awe cu e compromiso cu aki 70 dia nos ta bek aki pa celebra victoria di partido AVP.”
Benny Sevinger a conclui su discurso expresando un gratitud inmenso na e esnan presente, na e pueblo di Rancho, na e pueblo di Aruba y na Partido di Pueblo Arubano, AVP pa a dun’e e oportunidad di guia e pais. “Simpelmente no tin palabra pa expresa esaki. Boso nan ta guia y nos ta ehecuta. Esey ta e manera cu democracia ta traha na Aruba.” Sevinger a bisa.
