“Partido MEP y Bikker a neglisha husticia pero awe nan kier culpa otro partidonan pa nan fracas, caminda nan a laga pueblo bibando den temor pa nan bida.

Pa colmo un biaha mas e persona cu a laga Lotto pa Deporte na rand di bancarota,  a sali pa defende un maneho fracasa di husticia, neglishando e maneho fracasa di un minister cu nunca el a coregi.

Tiramento y matamento ta na orden di dia pero despues cu nan a priminti pueblo cu lo caba cu tur crimen na Aruba, awe nan  mester admiti cu a hunga cu sintimento di pueblo y a haci politica barata pero ningun momento a presenga ni solucion y ni proteccion.

Miyones extra e gobierna aki a gasta  pero dialuna den Parlamento,  e minister mediocre a bin pa admiti cu cos a bay for di man y a bira pidi Parlamento pa aproba pa e por gasta mas placa cu tin den un presupuesto no aproba. 

Presupuesto mester a wordo trata un aña pasa pero a opta pa no haci esaki pa asina sconde e realidad di e situacion for di pueblo.

Despues a opta pa baha gobierno pa no pasa e presupuesto, caminda  no a tene cuenta cu bida di niun hende den e pais aki,  tampoco seguridad di  polis, trahado di KIA of bomber.

Sinembargo awor ta bira culpa partidonan cu no tin ni arte ni parte den e maneho fracasa di husticia aki pero si nan a logra pa convence RAIZ pa knik mee pa logra den nan intent.

Esaki no ta cambia e realidad cu boso a pone boso interes personal prome cu seguridad di henter un pueblo y awor kier sconde tras di otro Partido,”  Parlamentario Arthur Dowers a declara.