“Cu un ley cu a wordo aproba ayera nochi door di e fraccionnan di MEP y RAIZ den Parlamento di Aruba, tur hende na Aruba, tur negoshi na Aruba ta bay wordo afecta severamente. E ley aki di Gabinete Wever Croes yama “PLAN DI BELASTING 2023”, pero en realidad e ta un PAKETE DI MEDIDA. E ta ensera e peor medidanan cu nos pais a yega di conoce den hopi tempo”, esey tabata e promer reaccion di Lider di Oposicion, mr. Mike Eman despues di a bataya te cu 1’or di marduga contra di pakete di medida aki.
Fraccionnan MEP/RAIZ a nenga di invita sindicatonan y organisacionnan comercial pa scucha nan opinion tocante e ley aki y su consecuencianan. Asina mes diferente organisacion a analysa e pakete di medidanan den e ley aki y a duna nan consehonan. Tur conseho y advertencia na Gabinete Wever Croes tabata serio, cu desaprobacion fuerte pa e medidanan den e ley y cu un apelacion urgente na gobierno pa no trata e ley aki.
Fraccion di AVP a insisti pa scucha gremionan, pero sin niun forma di dialogo, MEP y RAIZ a aproba pa di cinco aña consecutivo un pakete di medida pisa. Loke ta haci e pakete aki diferente cu tur e otro añanan, ta e cantidad di medida pa tur hende y tur sector di nos economia. Tambe e consecuencianan di e medidanan aki lo ta mas severo pa henter pueblo: tur hende ta bay atras, negoshinan chikito lo tin mas problema pa keda habri, Aruba ta bay bira hopi mas caro pa turistanan, mientras cu ta kita di e placa cu tin disponibel pa haci mercadeo pa Aruba den exterior.
Fraccion di AVP a adverti gobierno y partidonan MEP y RAIZ, cu e medidanan aki ta bay causa mas pobresa; cu nan lo pone specialmente companianan mediano y chikito bou hopi pression financiero y cu peliger pa sera nan negoshi; y ora negoshinan sera hopi hende lo perde trabou y cu e medidanan nobo aki di MEP y RAIZ lo haci Aruba menos atractivo pa turistanan y inversionistanan. Pero mas cu tur fraccion di AVP a mustra cu cifranan oficial di departamentonan di gobierno mes, cu specialmente e mas cu 50 mil hende cu ta gana un salario menos di 3000 florin pa luna, e pensionadonan cu un pensioen di gobierno/SVb, e trahadonan cu ta traha riba nan mes y e ciudadanonan cu ta haña un onderstand, tur lo bay ainda mas atras den nan forsa di compra! Partido AVP a calcula cu ta mas cu 50.000 hende lo wordo seriamente afecta door di e medidanan aki di MEP y RAIZ cu e peliger grandi cu mas hende lo cay den pobresa!
Pa preveni esaki fraccion di AVP a presenta un amienda durante di e reunion publico cu a ensera un catidad di proposicion pa evita e medidanan di Gabinete Wever-Croes y pa duna un alivio na pueblo, entre nan proposicionnan pa aumenta reparatietoeslag pa empleadonan na 300 florin pa luna y tambe pa pensionado, weduwen en wezen y bijstandtrekkers. Pero Fraccion di MEP y RAIZ a vota contra di e amienda di fraccion di AVP.
