fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Hof ta surpasa su tarea pa impone matrimonio homosexual

Hof a para bira activista y a dicidi cu e mes ta bay traha ley. Esey ta locual nos ta mira den sentencia di Hof di dia 6 di december ultimo, na unda Hof ta crea e matrimonio homosexual (Gemeenschappelijk Hof van Justitie 6 december 2022, ECLI:NL:OGHACMB:2022:135). Segun Hof e articulonan den e Codigo Civil di Aruba tocante matrimonio ta incompatibel cu “articulonan 3 y 12 di e Constitucion di Aruba”. Esaki ta un descuido di Hof, pasobra el a uza articulonan di e Constitucion di Curaçao. Sin embargo Hof a dicidi pa elimina aplicacion di e articulonan di e Codigo Civil cu ta bisa cu un matrimonio por wordo contrai solamente entre un homber y un muhe.

Esaki no ta prome biaha cu Hof ta mustra su cara di activista. Algun aña pasa Corte Supremo (Hoge Raad) a taha Hof caba cu Hof a surpasa su tarea como hues, den un caso na unda Hof kier a impone su mesun solucion riba e asunto di cua fam un mucha ta haya ora un tata ta pidi hues pa e por reconoce e mucha. Den e caso ey Corte Supremo a mustra Hof riba e hecho cu Hof mester traha en conhunto cu e legislador (cu ta Gobierno conhunto cu Parlamento) y no purba di bay sinta riba stoel di e legislador (Hoge Raad 13 oktober 2017, ECLI:NL:HR:2017:2614). Den e caso di matrimonio homosexual tin un chens grandi cu Corte Supremo lo taha Hof atrobe pa motibo di activismo politico.

Den e sentencia di dia 6 di december ultimo Hof ta bolbe haci comosifuera cu e ta esun cu mester traha ley, pasobra segun Hof nos legislador no ta haci nada pa parehanan homosexual. E ta crea e aparencia cu el a tene cuenta cu tur aspecto di e caso, pero e no kier a duna atencion debido na e aspecto democratico: Hof no a splica cu tin varios manera pa soluciona e problema di desigualdad entre parehanan heterosexual y parehanan homosexual. Es mas, Hof no a dedica atencion na e hecho cu nos legislador (Gobierno conhunto cu Parlamento) a debati fuertemente riba e asunto aki. Deliberadamente a scoge pa ignora cu nos legislador a scoge pa crea union civil (geregistreerd partnerschap) como un alternativa pa matrimonio pa parehanan di mesun sexo.

No ta dificil pa imagina con algun hues, cu nan bon salario y bon studia, no tin aprecio pa diferente sentimento cu ta biba den un comunidad. Pero ta incomprendibel cu Hof no ta orienta su mes debidamente riba e sentencianan di Tribunal Europeo di Derechonan Humano (EHRM). E Tribunal Europeo aki ta reconoce cu ora paisnan Europeo a crea e derecho riba matrimonio den e Convenio pa Proteccion di Derechonan Humano (EVRM), tur e paisnan aki tabatin e matrimonio tradicional den mente, esta un matrimonio entre un hende homber y un hende muhe. E Tribunal Europeo aki tambe ta reconoce cu no tur pais den Europa a introduci matrimonio homosexual y cu tin varios opinion riba e asunto aki. Es mas, e Tribunal Europeo si ta respeta diferencia di opinion encuanto matrimonio homosexual, cu condicion cu e paisnan cu ta respeta e igualdad y privacidad di parehanan homosexual door di crea como alternativa un union civil. 

Locual Hof ta demonstra cu su sentencia ta cu nos ta biba den un mundo na unda no tin espacio pa respet pa diferencia di opinion encuanto matrimonio homosexual. Tampoco tin espacio pa un debate fuerte riba contenido den arena politico. Den un mundo na unda Hof ta impone su boluntad, ta bira obvio cu esun cu tin poder ta impone su boluntad riba e otro. Despues cu nan a dicta sentencia y nan bay cas, nan ta hustifica nan mes cu e excusa cu religiosonan ta ignorante, fanatico (bigot) y homofobo. Mientras tanto Hof mes ta mina nos democracia, nos estado di derecho cu su derechonan humano y mas importante ainda: e ta mina e confiansa den e poder hudicial, pasobra e stoel di legislador ta pertenece na Pueblo.