Parlamentario, drs. Mervin Wyatt-Ras, durante conferencia di prensa semanal di fraccion y di partido AVP a trece padilanti cu porfin e prome grupo di mucha muher a cuminsa participa den e proyecto di formacion social. Esaki ta un proyecto di mas o menos 10 aña, cual proyecto a inicia cu mucha homber so como grupo.
E proyecto aki ta basa ariba e ley di sociale vorming cu a ser
presenta dor di e Minister Presidente di e tempo ey, Mr. Mike Eman di Gabinete Eman I y tur miembro di Parlamento a aproba e ley aki unanimamente. Na anja 2011 ya caba den un reunion publico, durante cual a presenta e pensamento pa e proyecto aki, parlamentario Mervin Wyatt-Ras a presenta un mocion pa inclui mucha muher den e grupo pa sigui formacion social. Motivacionnan pa e mocion ta e.o. cu den estadistica di aña 2010 por nota cu e cantidad di mucha muher ta casi igual cu e cantidad di mucha homber cu tin dificultad y cu no ta caba skol. Tambe ta necesario pa duna e mucha muher mesun oportunidad cu mucha homber pa haya un formacion adecuado. E mocion a ser firma dor di mas colega den Parlamento y a ser aproba unanimamente den reunion publico.
Ora cu a pasa e ley, den prome instancia, a bira posibel cu hobennan masculino di 18-24 anja, cu no a caba skol of cu no tin suficiente perspectiva por a haya un segundo oportunidad pa sigui un opleiding of un estudio y formacion den cierto curriculum/area y tambe ricibi formacion pa desaroyo di habilidadnan practico y social. E hoben por a haya un educacion y sosten pa asina e por bai dilanti den su bida.
Tin diferente factor cu ta haci cu un hoben no ta caba skol. Tin e.o. factornan academico, psychosocial y familiar cu ta haci cu e hoben ta “ontspoor” y no ta caba skol. Banda di esey tin e aspecto di motivacion cu ta un fenomeno di e tempo di pubertad. Hobennan durante pubertad ta bezig cu nan mes y cu nan peers. Ademas tnan in dificultad pa focus, locual por conduci cu nan por “drop out”.
Durante tur e a añanan parlamentario Wyat-Ras a keda boga pa e mocion di inclusion di mucha muher den e proyecto y tabatin como contesta cu ta buscando e forma y mester di personanan of profesionalnan cu por atende cu mucha muhernan den e proyecto, cual ta ensera training militar tambe.
Wyatt-Ras ta satisfecho cu su vision y di su partido a keda realisa despues di 10 anja. Tabatin hasta un tempo despues cu gobierno a sinta na aña 2017 cu no kier a prolonga e proyecto y no tabata paga e coordinado di e proyecto. Sinembargo pueblo a keda pidi pa e proyecto aki como yudansa pa nos hobennan y mustra riba mes e necesidad di esaki, dor di cual gobierno a sigui cun’e. Wyatt-Ras ta felicita e persona cu semper a manage e proyecto, juffrouw Jessy Ras, pa esaki y tambe tur esnan cu ta rond di dje cu a traha pa haci e proyecto posibel, incluyendo Kazerne Militar. Paso a mira cu e ta algo necesario pa nos hubentud. Wyatt-Ras ta spera cu e 15 mucha muhernan cu a cuminsa cu e proyecto y 15 mucha homber tambe, pues 30 hoben por sigui e trajecto te na su final y cu nan por bin den contacto tambe cu dunador di trabou pa asina nan por ser ubica riba e mercado laboral pa nan por sigui den futuro na un trabou pagabel. Ta di elogia cu porfin mucha muhernan cu no a caba skol por haya oportunidad igual cu mucha homber hombernan pa desaroya nan mes.
