Sin material esencial, no ta posibel pa servicionan clave di gobierno duna e servicio basico na pueblo. Esaki mester keda prioridad pa funcionamento di servicio den diferente departamento di husticia, ta locual cu parlamentario Robert Candelaria a vocifera.
No ta solamente frustracion pa falta di lidersgo pero tambe falta di atencion total di e mandatario durante su cargo a pone cu diferente departamento di husticia a mira un deterioro y decadenecia grandi pa kasi 4 aña caba.
Na varios ocasion a hala atencion di e mandatario, a duna sugerencia y presenta solucion na un sin fin di obstaculo cu a presenta y cu a haci e trabou y e servivio cu tin cu brinda na e comunidad, practicamente imposibel.
Awe nos ta mira con e situacion a keda bay atras te na e punto cu ta bira un peliger tanto pa e funcionario como e pueblo mes. Departamentonan no por brinda ayudo, door cu e sistema no ta funciona. Un reto nobo cu a presenta su mes ta awor polis no tin ni acceso mas na nan computers pa traha mutatie y proces-verbaal. Mester warda turno pa haci uso di e poco computer cu ainda ta funciona, poniendo mas precion y reduciendo e ora cu nan por ta haciendo nan trabounan.
Igualmente a boga for di hopi tempo caba pa duna prioridad na ekipo di brandweer cu ta den gran nececidad. Ta un esfuerso enorme ta haci pa continua e trabou diario mientras nan ekiponan y material basico y esencial ta den nan ultimo fase di exsistencia. Ta un riesgo grandi ta core cada biaha cu mester subi caya tanto pa e personal como e situacion cu nan tin cu enfrenta.
Por a tuma nota cu e mandatario, sosteniendo e gobernacion demisionario, a purba di inverti den un capital cuantioso pa un aparato di scan den eleccion venidero. Un placa cu no tabata tin hustifica pa gasta y cual lo no a haya sosten pa pasa. Nos ta spera cu e suma cu kier a aloca pa e proyecto robes aya, awor por wordo aloca den material esencial manera computer pa polis y ekipo pa brandweer cu awor tin mester di dje den Cuerpo Policial y den Cuerpo di Bombero.
E apelacion ta bay un biaha mas na Andin Bikker como Minister encarga, pa pone prioridad na e caminda corecto y haci uso di entre otro fondo cu nan kier a uza pa e machin di scan, pa hinca esaki mesora den computer y matetial den e departamentonan di husticia cu ta den gran nececidad.
