‘Progreso general di nos economia y formacion di nos hobennan ta y semper lo keda un di e puntonan mas importante den mi metanan como politico’

8 aña pasa, Jennifer Arends-Reyes a causa un impacto sumamente grandi den comunidad, ricibiendo sosten masal di Pueblo den Eleccion Electoral 2013. Comunidad a duna Jennifer e confiansa di drenta nos organo di mas halto, Parlamento. Durante 8 aña largo Jennifer a sa di traha na un manera sumamente profesional, manteniendo un nivel di positivismo y firmesa, logrando di e manera aki diferente proposicionan y mocion na bienestar di Aruba y sumamente activo den diferente plataforma cu ta concerni desaroyo economico pa nos pais Aruba.

Progreso y Formacion

Segun Parlamentaria Arends-Reyes, Progreso general di nos economia ta un punto di prioridad pa asina sigura continuacion sostenibel den tur e areanan cu ta na final di dia e weso di lomba di nos poder di compra, sea e ta e producto Aruba, stimulacion di companianan chikito y mediano of introduccion di industrianan nobo cu lo crea su ‘spin-off’pa Aruba su desaroyo economico.

Ta di remarca cu progreso general di nos economia, ta bay man den man cu formacion di un comunidad inteligente y capaz. No solamente mester pone enfasis riba ideologianan a corto plaso, pero mester sigui inverti den e fundeshi mas importante di un pais cu ta su Enseñansa. Ta aki ta unda cu nos futuro lo wordo forma, e formacion aki ta depende di nos esfuerzo y inversionnan di awo pa cu termino largo.

Determina cu Firmesa

‘Traha pa nos Pueblo ta un trabou sumamente duro y exigente. Pero danki na mi experencia y mi determinacion mi ta sintimi capacita pa tuma cualkier reto cu ta pa bienester di nos comunidad,’ Jennifer ta sigura. Determina cu Firmesa ta dos punto cu Jennifer tin hopi na serio. Durante su trayectoria como Parlamentaria, Jennifer a keda al tanto di desaroyononan como tambe den su area di experticio cu ta Enseñansa y Turismo.

‘Prome cu politica, Mi a traha como docente pa 10 aña, guiando hobennan den nan desaroyo bo ta biba di cerca kico ta motiva no solamente e hoben pero tambe kico realmente nos docentenan tin mester pa por ehercenan profesion na e mihor manera posibel,’ di acuerdo cu Sra. Arends-Reyes. Tecnologia den Enseñansa lo ta di berdad un avanse, pero ta un parti chikito di cambionan structural cu realmente mester sigui wordo implementa.

Contacto cu Pueblo

Durante 8 aña largo, Jennifer a keda hopi cerca di Pueblo, y a mantene semper contacto cu nos digno hendenan pa scucha nan deseonan pa un mihor Aruba. Esaki semper tabata e base di motivacion di Jennifer pa continua cu su dedicacion pa nos Aruba. Manteniendo un relacion estrecho cu pueblo, Jennifer ta bishitando varios hogar huntu cu su Team, pa asina pa pidi sosten y alavez haña opinion y pensamentonan di nos digno pueblo. ‘Nos hendenan ta aprecia nos dedicacion y ta pidi pa nos continua cu nos trabounan’, ta algun di e reaccionnan positivo cu ta wordo ricibi. Ideanan y necesidadnan ta wordo scucha y sigur ta e empuhe pa contenido di continuacion di trabounan di Jennifer Arends-Reyes como politico y candidato sumamente fuerte riba e lista di AVP… 11 T’esun!