Lider di fraccion di AVP Marlon Sneek,  dialuna mainta tempran a dicidi di bay para dilanti e casino di Holiday Inn, pa mustra un biaha mas e forma con gobierno di MEP ta fayando cu trahadonan,  faltando respet pa esunnan cu a perde nan trabou, privilegiando esunnan cu tampoco tin respet pa  trahadonan cu a wordo manda cas.

Segun sr Sneek, ayera mainta un biaha mas fraccion di AVP  a dirigi un ‘rappelbrief’ pa gobierno den cual ta pidi claridad riba e situacion di ex trahadonan di Excelsior Casino, cu a bati bancarota, perhudicando tur e trahadonan di e casino.

Marlon Sneek a mustra cu e trahadonan perhudica mester a cobra censantia ya cu no tabatin ningun areglo haci pa nan ora cu e casino a dicidi di dal porta cera pero awor di repente, for di nada, ta bin haya sa cu  gobierno  demisionario a dicidi di duna e hotel permiso pa opera un casino nobo den cual ta pone mashin di hunga so, loke ta nifica cu no mester di e trahadonan cu a wordo manda cas algun luna atras.

Ta un abuso grandi, un disparate atrobe di un gobierno cu nunca tabatin ningun hende central, tampoco trahadonan cu a wordo perhudica malamente pa nan dunado di trabou.

Parlamentario Sneek a sigui mustra cu loke ta mas serio ainda, ta e hecho cu e hotel cu tambe ta haci uso di ‘loonsubsidie’ cu gobierno ta duna, ta haci e cos aki cu e trahadonan di e casino cu a wordo manda cas, ya cu tur cos ta mustra cu lo no tin mester di dealers of floormen mas den e sistema cu e hotel lo kier usa.

Loke tambe ta serio ta e hecho cu ministeri di labor Glenbert Croes, ta permiti e abusonan aki tuma luga y na luga di busca un solucion pa e ex trahadonan di Excerlsior Casino,  su gobierno ta permiti e hotel habri e casino den un otro context, cu mashin so, pues cabando cu tur speranso cu e trahadonan aki tabata carga pa un dia haya nan trabou bek c’un operado nobo.

E hotel mes lo ta e operado nobo pero lo no tuma ningun trahado cu a wordo perhudica bek den servisio  y esaki sin duda ta di lamenta pero ora cu scucha informacionnan cu e grupo di trahadonan perhudica aki ta duna riba e forma di procede di e minister di labro demsionario, e ta splica di con gobierno di MEP ta scohe pa e hotel y no pa e trahadonan.

Marlon Sneek a sigui mustra cu na varios ocasion minister Glenbert Croes ta hospeda cu famia den e hotel aki y durante fiestanan di pasco y cambio di aña, practicamente henter un piso tabata na disposicion di e minister pa un total di mas di 10 camber.

Ta mas cu claro cu e hotel ta haya permiso pa opera un casino den un estilo nobo, solamente usando mashin mientras cu riba bienestar di e trahadonan perhudica, e gobierno ni e mandatario ta kibra nan cabes.