Drs. Mervin Wyatt-Ras durante conferencia di prensa di fraccion di AVP a trece padilanti cu e gobierno aki, en especial e minister di Salubridad, no tin curason ni compasion cu patientnan. E Parlamentario ta expresa esaki a base di e hecho cu Parlamento a ricibi un Landsbesluit (LB) dia 16 di oktober 2020 cu ta ensera un medida pa loke ta trata e lista positivo di remedinan cu patientnan tin derecho riba dje actualmente. Gobierno ta manda e LB aki y e mester keda na Parlamento pa 2 siman. Despues di 2 siman e LB aki ta bira legal. Wyatt-Ras ta haya esaki un falta di respet pa nos hendenan. Ya caba diferente medida a ser tuma. P.e. a bin medida riba transporte di patientnan cu ta tuma dyalise, medida riba rancamanto y yenamento di djente, medida riba diferente “zorgverleners” of dunadornan di cuido y awor e medida aki riba otorgamento di medicina. Nos patientnan no merece e trato aki di minister di salubridad sin cu e ta consulta cu nos. Pa loke ta trata e landsbesluit aki pa tuma medida ariba nos cuidadanonan si no ta ser poni ariba agenda pa reunion mientras cu pa saca minister Lopez-Tromp mesora a yama reunion pa trata e LB al respecto.
E medida aki ta touch hopi hende, patientnan y netamente esnan cu tin un entrada abou. Awor aki cu nos ta den un pandemia cu nos hendenan tin cu biba sea di un entrada abou di FASE, un loonsubsidie of un pakete di cuminda, awor aki e medida aki ta bai dal nos hendenan hopi duro. Minister ta indica cu e ta sigui cu locual ta e palabracionnan y condicionnan di Hulanda y sigur esaki ta un di e palabracionnan cu gobierno aki sin curason ni compasion a haci cu Hulanda. E medida aki lo bai afecta nos hendenan net na e momentonan aki cu nos ta den un pandemia, net e momento aki cu cuido mester haya mas atencion y cu otro paisnan ta duna mas ayudo financiero y mas atencion na e area di cuido medico, anto net awor aki ta bai corta den cuido medico y nos hendenan. Mervin Wyatt-Ras ta haya esaki un situacion inacceptable. E ta spera cu Presidente di Parlamento mescos cu ela core pasa un LB pa retira un minister e por core yama un reunion, esta un reunion di Comision Central, pa Staten por duna su “gevoelens” y impedi e medida aki den curason di nos pueblo. E mester por yama e reunion pa defende nos pueblo cu ta pasando den tempo dificil. Segun Raad van Advies ta indica e Adviescommissie Geneesmiddelenlijst Aruba (AGA) a haci un exercitie unda e sistematica di cuido di Hulanda a ser usa como punto di salida. Segun cu Raad van Advies ta indica e LB ta basa ariba experencia di Hulanda, mientras Hulanda ta un pais rico, un pais cu tin hopi recurso, hopi medionan financiero, tambe hopi ayudo ‘in place” y tin mas placa den cartera. Den e caso aki no por compara Aruba cu Hulanda. Raad van Advies tambe a duna su conseho al respecto. Nos tin tur esaki. Pero no a yama niun reunion. Ta tuma medida y niun musca no ta bula.
Segun minister lo spaar 3.5 miyon florin den prome fase y 2.5 miyon den segundo fase.Ta trata di remedinan y liquido riba diferente area di curpa y enfermedad: halamento di rosea, tosamento y griep, dermatologia, curason, stoma, tripa, problema cu zuur, skelet, weso, hormona y sistema nervioso. Diferente di e remedinan lo no aparece mas riba e lista positivo y e patient lo mester paga pa nan. Parlamentarionan di coalicion ta permiti esaki. Lamentable cu ni un musca no a bula.
