E votamento di 15 di october ultimo pa retira minister Lopez- Tromp for di su posicion, a tapa e instituto parlamentario di Aruba cu un mancha scur di ilegalidad. Sea pa ignorante pa cu nos constitucion, arogancia di poder, complicidad den ilegalidad of tur tres factor hunto dia 15 di october ultimo den sala di parlamento a demostra cu e grupo di 10 consistiendo di presidente di parlamento, fraccionnan di MEP y POR no ta para pa integridad.
No tin otro splicacion pa motibo cu nos constitucion di 1 januari 1986 ta deriva for di esun di Antiyas Hulandes desde 1955, cual alabes a haya su derecho di existencia danki na e Statuut di Reino Hulandes for di 1954.
CONSTITUCION:
Den nos constitucion ta hancra den capitulo 3 articulo 16 inciso 1:. De Staten mogen niet beraadslagen noch besluiten, zo niet meer dan de helft van het aantal zitting hebbende leden ter vergadering aanwezig is. Traduci: No ta permiti pa parlamento discuti ni dicidi si no tin mas cu mitar di e cantidad di miembronan cu asiento presente durante e reunion. Cu otro palabra den inciso 1 ta regla cu un reunion publico for di su principio te na su final, o sea discusion y votamento mester conta semper cu presencia di minimo mas cu mitar di e miembronan. Mas despues ta bisto tambe con esaki ta regla den e reglamento di orden di parlamento.
Mientras cu inciso 2 di e mesun articulo ta bisa: Besluiten worden genomen bij volstrekte meerderheid van stemmen. Traduci: Decisionan ta wordo tuma cu e mayoria absoluto
REGLAMENTO DI ORDEN DI STATEN:
Mientras cu den nos constitucion capitulo 3 ta forma e cuadro den cual nos parlamento tin cu funciona. For di e cuadro aki ta deriva e reglamento di orden di parlamento di Aruba, motibo pa cual ta e compas di funcionamento di e parlamento pero kedando semper den e margen di e cuadro di nos constitucion.
Articulonan 25, 26 y 27 di e reglamento ta regula cu sin quorum no por tin reunion publico. En corto den e articulonan aki e quorum di mitar plus 1 ta wordo regla cu e palabra mas cu mitar. 21 dividi den 2 ta 10,5 cual ta trese cune cu pa un reunion publico di parlamento tin legalidad semper mester tin minimo 11 parlamentario presente. Cu otro palabra pa votamento tambe mester tin minimo 11 parlamentario presente, den e caso especifico aki dicidi riba un mocion, pa motibo cu e reglamento di orden mester keda semper den e cuadro di nos constitucion. Asina tambe cumpli cu constitucion cu decisionan ta wordo tuma cu e mayoria absoluto.
For di e articulonan menciona ta papia palabra cla cu na e momento cu no tin 11 parlamentario presente durante e reunion, esaki mester wordo suspendi pa falta di quorum. Esaki ta trese cune cu e mocion aproba pa e grupo di 10 contra minister Lopez- Tromp di 15 october ultimo no ta legal.
Articulo 45 inciso 1 ta regla cu e reunion ta consisti di discusion y votamento. Cu otro palabra e articulo aki ta den sincronisacion cu e regla di quorom cu semper mester tin 11 parlamentario presente durante e reunion completo.
Es mas articulo 6 di e reglamento di orden ta regla entre otro cu e presidente di parlamento mester vigila cu e articulonan di e reglamento di orden wordo respeta y cumpli. Cual ta trese cune cu e presidente, entre otro, mester ta atento cu for di comienso, durante y te na final di un reunion minimo 11 parlamentario ta presente. Obligacion cu sr Thijsen no a cumpli cune cabalmente como presidente ora di votamento dia 15 di october ultimo unda cu dado momento hasta ta 9 miembro so tabata presente.
Esaki ta visibel riba grabacionan cu ora di e votacion ilegal sr Howell no tabata presente den e sala di reunion y a vota for di pafor di sala ora cu e griffier a anuncia e nomber di e siguiente votador caba. Cual ta en pugna cu articulonan 35 y 45 inciso 5 di e reglamento di orden.
Mientras cu su colega di fraccion di POR esta Maduro tambe a vota en pugna cu articulo 45 inciso 5 esta vota ora cu nomber di e siguiente votador a wordo anuncia caba.
En corto tur locual cu grupo di 10 por a bai contra ley y reglanan constitucional den nan arogancia pa baha sra. Lopez- Tromp como ministro a sosode asina tambe sin reparo alguno. Berdad ta cu tin un grupo di 10 parlamentario cu a demostra di no tin confiansa mas den sra Lopez- Tromp, pero berdad tambe ta cu no por ignora nos leynan constitucional asina sin mas. Pa motibo awe ta contra e ministro concerni, den futuro ta e derecho humano di cualquier ciudadano aki na Aruba por ta na turno.
INTEGRIDAD:
E votamento ilegal di e grupo di 10 a demostra cu e coalishon no ta para pa integridad. Palabra cu promer ministro ta vocifera a la minuut, pero cu e hecho y comportacion di e grupo di 10 riba 15 di october ultimo ta demostra un bes mas cu integridad ta existi na palabra solamente pa e coalishon actual. E sucedido di 15 di october ultimo den sala di parlamento ta digno di militarnan extremista cu ta jega na poder pa medio di golpi di estado y promer cos cu ta wordo hasi ta trapa riba constitucion di un pais pa asina fortifica nan poder estatal pa eternidad.
Cu e votamento ilegal aki cu ta contra tur ley constitucional di Reino Hulandes, incluyendo Aruba nos por conclui cu bao e coalicion actual cu Democratie ten ondergaan, Democracia ta bayendo den su pataraca. Spera cu e grupo di 10 recapacita y sigui tambe e curso di Trias Politica si acaso ta pa ignorancia a actua ilegal den parlamento.
