Tres aña despues cu Prome Minister Evelyn Wever Croes ta encarga cu e cartera di energia, ainda tanto pueblo di San Nicolas y pueblo di Aruba den su totalidad, ta sperando ta kico gabinete Wever Croes su intencion ta cu e refineria na San Nicolas.
Parlamentario Mike de Meza di AVP a mustra cu tabata Evelyn Wever Croes cu a grita cu bos halto cu e tin un cantidad di companianan interesa pa maneha e refineria, habri esaki y percura pa e refineria aki cuminsa funciona.
Sinembargo awe ainda nada di e refineria, nada di su apertura y tanto pueblo di San Nicolas como di Aruba ta mirando cu henter e proyecto di refineria ta para keto cu solamente algun personal di seguridad trahando den e luga aki.
“Tur hende por corda cu tempo cu Evelyn tabata den campaña, el a pasa bisa tur hende cu su persona tin un cantidad di companianan interesa pa habri e refineria, companianan cu ta habri porta pa su persona y no pa Mike Eman.
Awe den luna di oktober y na vispera di cumpli tres aña den gobierno, e unico cu a saca bentaha te cu awor di e refineria den vision y pensamento di Prome Minister Evelyn Wever Croes, ta e bufete di abogado di su tata cu en realidad ta su bufete tambe como heredero y caminda cu e tabata traha tambe.
Como Prome Minister Evelyn a emiti un carta caminda e ta informa tur instancia cu e bufete di abogado di su tata no solamente lo representa su persona como Prome Minister den diferente reunionnan cu tin, tambe a pidi e bufete aki pa hinca den otro e posibilidad pa kibra contract cu CITGO, loke nan a cumpli tambe.
Mientras cu Banco Central a informa recientemente cu gobierno di Aruba dor di e pandemia di corona virus lo haya alrededor di 290 miyon menos na entrada, aki tin cu constata cu Prome Minister y e bufete di su tata, a permiti CITGO bandona Aruba sin cu nan a pa ni un cen preto di 300 miyon florin cu nan lo mester a paga si no a cumpli cu e contact cu tabati.
Pues aki un biaha mas pueblo por a mira cu Prome Minister no tin nada pa duna pueblo, no tin ningun proyecto pa presenta na pueblo pero ta bira cera e proyecto di refineria lagando e compania aki bay sin paga 300 miyon florin.
Ta mesun Prome Minister aki cu tabatin cantidad di compania den rij ta sperando riba su persona pa bin Aruba y habri e refineria pero awe ni nomber e no tin corda compania y riba dje a bay hunga otro wega cu leasemento di tankinan pa almacena crudo, papiando cosnan grandi, gañando pueblo un biaha mas.
C’un cara serio el a declara na medionan di comunicacion cu varios grupo a participa den un destaho pa lease e tankinan caminda un compania a brinda e miho oferta cual Evelyn su gobierno a acepta.
Awor ta bin resulta cu e compania aki, cu a duna e miho oferta den e tantisimonan cu lo a inscribi pa e destaho aki, NO tin placa pa paga lease, pues prome cu e proceso a cuminsa funciona, ya un biaha mas tur cos ta na cero ya cu e compania cu tanto Evelyn a confia cu nan lo haci algo pa asina e por mustra kico el a haci, simplemente no tin placa.
Ta otro engaño mas di un Prome Minister cu lo bay den historia como esun di mas gañado cu pueblo a yega di conoce, uno cu hasta a gaña gobierno di Reino, bisando un cos pa despues haci otro cos.
Entre otro el a firma un protocol na luna di oktober di 2018 cu te dia di awe ainda e no por cumpli cune y riba cual ainda tin discusion mientras cu tin e famoso ley di CAFT cu fraccion di MEP kier a cambia contra tur palabracion haci cu Evelyn, caminda e mes a sostene e cambionan aki, pa despues wordo confronta c’un KB y medidanan for di Den Haag, caminda practicamente el a entrega autonomia financiero di nos pais.
Awor pueblo a ripara cu Prome Minister Evelyn simplemente no por biba si gaña, ora cu supuestamente na augustus el a dialoga cu Minister Marisol Lopez Tromp den e situacion cu a presenta, caminda e minister aki a mustra cu tin varios Minister di su gabinete meti den decisionnan ilegal y incorecto, awor ta bira y permiti su marionetanan den Parlamento, bula cabes di Minister Marisol Lopez Tromp.
Un votacion caminda tur cos ta mustra cu otro marioneta mas, kisas esun di mas grandi den Parlamnto na e momentonan aki, esta Ady Thijssen, a trata di pobrecha di cierto palabracionnan pa mal usa esaki contra di Minister Marisol.
Un Prome Minister cu ta pidi tur hende por fabor keda cas, no Sali riba caya, no bay beach, keda paden pa lucha contra corona virus pero ta bira gaña pueblo atrobe, ora cu pa su persona y famia si ta bon pa bula bay Miami, Florico pa pasa su vacacion anto bin bek y bula cabes di un minister di su conseho di Minister,” Parlamentario Mike de Meza a declara.
