Expertonan for di hopi ramo den mundo medico, di cuido y tambe enseñanza a bini hunto riba invitacion di Partido di Pueblo Arubano (AVP) pa cera cabes y dialoga riba e maneho mas adecua cu cual por atende e pandemia COVID-19. E encuentro a tuma luga den sala di Renaissance Convention Center diahuebs atardi parti den dos sesion durante cual a analisa e complicacion- y retonan cu e meta di aporta na solucion y recomendacionnan.
Ex Prome Minister y lider di partido Mike Eman a habri e prome sesion compartiendo cu tur presente e programa y obhetivo di e encuentro. Specialista y ex Minister di Salud, dr. Ike Posner tabata e prome pa papia, sigui pa drs. Jerry Staring, director di DVG kende a elabora riba varios aspecto di maneho di su departamento. Entre otro a menciona con e prome pashentnan di e di dos ola ya ta recuperando, pero e preocupacion awo ta famianan den cas cu por ta mas vulnerabel pa e malesa. A bisa cu ta haciendo un bon trabou di stop e transmision dor di cera e kring rond di esunnan den cas teniendo na cuenta cu 70% di e contagio ta tuma luga eynan.
Presidente di SIMAR a tuma e oportunidad aki pa trece dilanti tur e preocupacionnan di e profesion di docente, manera por ehempel reduccion den presupuesto di algun scol cu te hasta 50% haciendo e trabou ainda mas dificil.
For di e sector farmaceutico, Sharon Arends-Bareño a papia riba e plan di contingencia cu Boticanan ta implementando den coordinacion cu DVG y Inspectie voor Geneesmiddelen pa percura pa un suministro constante di remedi na e poblacion.
Ex director di Inspeccion di Salubridad, dr. Livio Hermans a papia riba importancia di vitamina den defensa inmunologico, cuestionando tambe pakico no a probecha periodonan di cuarentena pa haci cierto investigacion riba efecto di suplemento manera vitamina D y B3, entre otro.
Na loke Eman a remarca cu falta di estadistica riba nos isla ta algo cu Nacionnan Uni a identifica na Aruba como parti di e programa di 17 SustainableGoals.
E dialogo tabatin un base asina amplio cu tambe a invita James Sneek, director di Kindertelefoon kende a elabora riba e presion cu tin bou di nos hoben- y muchanan dor di e crisis di COVID 19, indicando cu ya caba ta surpasando e promedio anual di contacto cu nan ta ricibi.
Otro ex Minister di Salud, dr. Alex Schwengle a papia di e hermentnan pa maneha e pandemia ta conocemento, experiencia, capacidad, comunicacion, transparencia y liderazgo. Comunicacion entre gruponan di trabou ta adecuado, pero no optimal y den cierto caso cu retraso.
E di dos sesion di e anochi cu a inicia pa 7’or a habri cu e presentacion di ginecologo drs. Babet Latour, infecciologo, drs. Bert Rodenburg y specialista dr. Deepu Daryanani, ultimo nan aki ta miembro di e Outbreak Management Team (OMT). A papia tambe den nomber di Asociacion di Specialistanan di Hospital Aruba (ASHA) y Vereniging Medische Specialisten Aruba (VMSA).
Dr. Hendrikus van Gaalen, Psikiatra y President di Hunta directiva di Respaldo tabata e siguiente orador tocando e aspectonan psicologico y psikiatrico den periodo di COVID-19. El a indica cu soledad ta un di e problemanan psicologico principal durante e crisis, vooral cerca esunnan cu regularmente ta ricibi bishita pa cuido medico, mescos cu pa otronan cu no tin acceso na computer y internet. Esaki ta bira pio dor di e falta di autonomia riba nan bida pa e medidanan di prevencion cu e pais ta tuma.
Di su banda, Sharlyn Faro, como president di ODEA a enfoca riba e capacidad caminda ta boga pa prepara y no warda te ora cu mas personal ta necesario. Te ainda e cantidad di enfermero cu a contagia ta chikito, pero teniendo na cuenta cu bou di condicionnan normal ya caba ta existi un scarsedad na personal, si mester yega un contagio mas grandi, p.e. den casnan di anciano cu ta cay bou di SABA, e por tin consecuencianan grave.
Ruben Croes di e test post na aeropuerto a duna un resumen di e prestacion di e punto importante aki den e lucha contra e pandemia.
Su tras a papia Dr. Osbaldo Anaya, cu a splica na un manera detaya e proceso di pone un pashent riba ventilator caminda mester paralise y e incomodidad enorme cu esaki ta nifica y e consecuencianan pa su salud.
Por ultimo, dr. Selene Kock, Longarts, tambe a hiba palabra compartiendo su experiencia durante e prome y di dos ola di COVID-19 na Aruba.
E comision organizador di Partido AVP encabesa pa mr. Mike Eman, drs. Mervin Wyatt-Ras, mr. Gerlien Croes, Robert Candelaria, mr. drs. Richard Arends y mr. drs. Arthur Dowers, cu conseho di drs. Anco Ringeling y mr. Nicole Hoevertsz ta gradici tur esunnan cu a acepta e invitacion y a contribui enormemente na un miho comprondemento di e situacion nos dilanti, aportando tambe cu nan recomendacionnan.
