Na opinion di Josephine Martila Albertus, como lider sindical di maestronan, un encuentro manera esun organisa dor di partido AVP tabata necesario for di basta tempo caba ya cu e informacion intercambia den dje a mustra di ta hopi util pa tur sector. Un di e puntonan mas resaltante cu SIMAR a bay cune for di e prome sesion di dos sesion diahuebs anochi den Renaissance Convention Center, ta e resultadonan presenta dor di Telefon pa Hubentud. Esaki a laga nan conoce e punto di bista di alumnonan riba diferente aspecto relaciona cu enseñanza.
Di nan banda, e presentacion haci dor di Albertus tambe tabata un di e puntonan mas resaltante di e encuentro caminda a tuma e oportunidad aki pa trece dilanti tur e preocupacionnan di e profesion di docente. A referi na un infraestructura deficiente den, por ehempel, e falta of fayo di un wasbak den klas pa laba man y falta di material higienico pa cumpli cu e reglanan di seguridad cu ta evita contagio.
Riba dje tin reduccion di presupuesto di scolnan cu ta afecta e produccion di material. Tambe a papia di hogarnan cu no tin conexion di internet, of cu tin p.e. 3 yiu, pero 1 solo aparato pa comunica cu scol. SIMAR a participa den su presentacion cu no ta tur scol ta cla pa habri dia 3 di september proximo. Otro aspecto pa tene cuenta cune ta cu tin maestro cu riba nivel emocional/psicologico no ta cla pa para dilanti di klas basa riba preocupacion valido pa nan seguridad y di nan famia. Riba tur e puntonan menciona, SIMAR ta trahando cu e directivanan di scol, aunke ta admiti cu ainda tin espacio pa mehora e comunicacion final cu e docente mes.
No ta solamente su preocupacionnan SIMAR a trece dilanti, pero tambe recomendacion cu tambe a comparti cu entidadnan gubernamental pa contribui na un manera adecua den terreno di enseñanza.
Partido AVP ta gradici e participacion valioso di SIMAR den e Encuentro Brainstorm COVID-19 for di cual tur participante a sali miho informa y prepara pa atende e pandemia.
