Pueblo di Aruba ta bibando den temponan complica cu ta birando mas y mas dificil pa hopi hende den comunidad. Hopi hende ta sigui perde trabou mientras otronan no tin mes di come.
E consecuencia di esaki ta cu hopi den nos hendenan ta perdiendo speransa.
Un di Gobierno su tareanan ta, pa crea oportunidad pa ciudadanonan y pa duna nan speransa real pero lamentablemente tur hende ta mira cu na luga di crea perspectiva pa pueblo, sabiendo tur e retonan cu pueblo ta encontra su mes cune awor, tog Gobierno ta sigui pone prioridad robes.
Robert Candelaria di fraccion di AVP ta mustra cu den pleno tempo di crisis, ainda Gobierno ta huur edificio caro innesesario y riba dje awor gobierno ta hinca energia den e discusion di Zwarte Piet.
“Awor cu hopi hende no tin nada di come, Gobierno ta inverti den compra di container pa cera hendenan ilegal pa asina probablemente cumpli cu fabornan politico.
Den pleno crisis, y despues cu prome minister y minister di enseñsa a priminti hopi cos, ainda tin hopi gañamento y promesa falso den enseñansa.
Te ainda tin un helikopter caro bulando rond siendo cu hopi den pueblo no tin di come.
Den e temponan difisil aki, nos ta nota cu gobierno kier sigui cu introduccion di plantacion di cannabis y nos ta corda cu na inicio di gobernacion, partidonan MEP, POR y RED a cumbini cu lo legalisa cannabis medicinal, pero nunca nan a palabra cu lo produci cannabis na Aruba.
Ni esun medicinal ni esun recreacional.
Loke gobierno si a bisa den su programa di gobernacion cu yama “Hunto pa Aruba di MEP-POR-RED” ta:
‘Medicina alternativo: Lo implementa e proceso pa legalisacion di cannabis medicinal. Mester tin e oportunidad cu e pashent por scoge pa medicina alternativo, entre otro cannabis medicinal, cu a mustra avancenan grandi den area di epilepsia, anorexia, glaucoma y maneho di dolor cronico.’
“Aki nos por mira cu loke gobierno a bisa cu nan lo haci ta legalisa e remedi pero esey a wordo cumpli caba. Un permiso a wordo duna na un empresario pa importa e remedi y esaki ta algo cu tur partido a bisa cu nan ta sostene.”
Prohibicion legal
Loke ta importante pa bisa ta cu e plantacion di cannabis cu MEP-POR-RED ta bezig ta priminti hopi empresario y partido pa asina gana placa, no ta posibel ainda. Gobierno a manda un cambio di ley na Raad van Advies pa conseho. E ley actual (Landsverordening Verdovende Middelen) ta stipula lo siguiente:
Artikel 2
De verbouw van planten van de soort Papaver somniferum L., van een der soorten van het geslacht Erythroxylon en van het geslacht Cannabis is verboden.
“Aki nos ta mira cu e ley ta prohibi pa cultiva of planta mata di e tipo Cannabis.”
Artikel 4
Het is verboden:
b. hennep, alsmede de zaden en bladeren, indien deze niet vergezeld gaan van de toppen,
c. de hars die uit hennep wordt getrokken,
d. de gebruikelijke bereidingen waaraan deze hars ten grondslag ligt
waaronder hashish, esrar, chiras en djamba),
A. in, uit of door te voeren,
- te telen, te bereiden, te bewerken, te verwerken, te ver-
kopen, af te leveren, te verstrekken of te vervoeren, - te bezitten, aanwezig te hebben of aan te wenden,
“Aki nos por mira cu e articulo aki ta prohibi pa importa of cultiva of procesa asta partinan di e mata manera blachi y simia. Ta asta prohibi awor pa bo tin parti di e mata den bo posicion,” Parlamentario Robert Candelaria a trece dilanti den conferencia di prensa.
E Parlamentario a sigui mustra cu ta mira cu tin hopi ta speculando cu permiso pa asina nan por planta cannabis pa exporta y gana placa. Nos ta tende cu tin 5 permiso cu gobierno kier duna, pero nos ta nota cu loke gobierno ta bisa y loke nan ta hasi, atrobe no ta mes cos. Aki gobierno ta bende e cuero prome cu mata e baca. Ley ta prohibi e cos, pero ya ta negosha deals pa gana placa.
