Para dilanti di edificio di EPI, miembro di fraccion di AVP, sr Arthur Dowers a mustra dialuna mainda, cu e partido mas grandi den e coalicion MEPPORRED, esta partido MEP, a duna Minister Rudy Lampe bendicion pa e kibra enseñansa publico.
Un decision cu despues lo laga pueblo desampara caminda e grupo di menos recurso, esunnan cu menos oportunidad pa drenta enseñansa priva, nan keda pa nan cuenta.
“Nos a bisa caba algun tempo atras cu Minister Rudy Lampe a bisa cu e ta bay pone e HAVO publico bou maneho di un stichting, cual vision ya caba partido MEP a doblega pa e sugerencia aki y awor e kier hinca EPI, cu ta un scol publico bou di un otro stichting.
Tambe Minister Lampe a dicidi cu na San Nicolas, Abraham de Veerschool cu ta un scol publico, cu ta bayendo hopi bon mes na e momentonan aki, un scol cu a wordo drecha bou gobernacion di AVP, el a dicidi cu e scol aki tambe e ta bay pone bou di un stichting.
Un stichting cu segun informacion cu nos tin dos scol caminda practicamente no tin mucha mas ta bay, pa salba e stichting aki Minister Rudy Lampe ta coy propiedad publico bay pone bou di e stichting aki, sin cu el a haya autorisacion di pueblo pa haci esaki, ya cu parlamento ta representantenan di pueblo.
Awor ta Sali na cla cu partido MEP lo a duna aprobacion na Minister Lampe pa e ehecuta su maneho manera cu e ta haya ta bon pero Lampe tin cu corda si cu partido AVP, cu ta e partido mas grandi na Aruba, no ta di acuerdo cu loke e ta haciendo y nos ta sigur cu hopi hende no ta di acuerdo cu loke e ta haciendo.
Segun investigacionnan haci, ta mustra cu Minister Lampe na momento cu e mester a percura pa e muchanan haya educacion y formacion na momento cu a presenta e corona virus, el a dicidi di bay scondi tras di su lessenaar hunto cu algun hende, pa haci y deshaci manera cu nan ta haya ta bon cu enseñansa y kibra tur loke ta enseñansa publico na Aruba, lagando posibilidad pa hopi mucha sin posibilidad pa haya enseñansa aki na Aruba.
Nan mes a haci un investigacion, concluyendo cu ultimo dos luna ta solamente 49% di muchanan na Aruba so a haya formacion y educacion y 51% no a haya educacion.
Mi ta puntra mi mes e ora kico ta Lampe su tarea como minister di enseñansa, ya cu su persona ta e prome yama pa percura cu den cuadro di leerplicht, pa garantisa cu muchanan ta haya formacion y educacion, tambe durante di corona virus.
Sinembargo Lampe a scoge pa bay scondi scondi bay purba con pa kibra henter un sistema di enseñansa cu pa añanan largo ta bayendo bon y caminda claro cu tin cosnan pa mehora, pero loke Minister Lampe ta haciendo actualmente, ta un escandalo di marca mayor pa e pais aki.
Loke ainda ta mas tristo ta e hecho cu e partido mas grandi den e gobierno di coalicon, gewoon a dobla rabo y ta acepta cu despues cu Parlamento a aproba un mocion cu ta exigi di e minister pa e keda cu su tenglanan for di enseñansa publico, awor ta bira acepta cu minister Lamper por haci e cos aki.
Nos a papia den parlamento cu e Minister aki siman cu a pasa pero den un reunion di comision caminda nada ta publico, pues den cierto sentido un reunion secreto y caminda ningun hende mag bin dilanti y papia loke a wordo dicidi den e reunion aki.
Sinemargo dos cu tin cosnan cu tog lo bay Sali den publicidad, mi ta kere ta mi deber di bisa pueblo cu den e reunion di comision aki, miembronan di fraccion di MEP a duna Minister Lampe green light pa e sigui haci e bagamunderianan cu el a bin ta cometiendo contra di enseñansa aki na Aruba.
Mi por ta full di acuerdo cu e minister pa drecha un scol manera EPI pero nos no ta di acuerdo cu ta hisa benta bou di un stichting existente y ni tin e decencia di bisa: ‘shonnan otro aña boso lo ta tanto dia na cas, lo haya lesnan on line y ta locura e cosnan aki ta.
Con bo por duna mucha y hobennan un vak manera timmeren y tur aspecto di esaki, on line?
Formacion y educacion, binimento hunto di hendenan na un scol, tin un balor agrega cu solamente subi on line pa haya educacionn y si kier brinda cursonan on line, nos ta 100% di acuerdo pero ta inaceptabel cu ta kibra un sistema di enseñansa cu ta funcionando sin cu e minister tin un motibo argumenta, ya cu e scolnan aki tey caba y mi por compronde su e scolnan aki no ta existi, por a duna curso on line pero e scolnan tey.
Si bo kier duna les merdia of anochi por biba cu esey pero no bin di e forma aki bin kibra henter un sistema di educacion, caminda tur hende lo bin scol un bes pa siman pa despues haci tur cos on line, pa motibo cu Rudy Lampe kier.
E cos aki ta un locura, un locura cu tin cu bay stop y mi ta haci un apelacion pa tur esunnan cu tin enseñansa na pecho, esta pueblo den su totalidad y sigur maestronan, pa hunto para e locura aki di Minister Lampe,” Parlamentario Arthur Dowers a declara.
