fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Nel Oduber ta tratando di scapa otro gobierno di MEP cu no a cumpli cu pueblo

Aruba ta pasando den momentonan sumamente dificil mescos cu henter mundo y den circunstancianan asina, ta rekeri seriedad mas cu tur cos, ta rekeri cu principalmente lidernan ta duna un bon ehempel di sinceridad na tur momento.

Sinembargo tin politiconan cu ta kere cu den e tempo aki, ainda nan por culpa otronan di nan propio disaster, busca excusanan caminda no tin pa busca y simplemente no por ta sincero cu nan mes, corda ta sincero cu pueblo.

Melvin Tromp di partido AVP ta mustra cu den ultimo dianan, a reaparece un figura politico cu ta kere cu e tin splicacion pa tur cos cu ta bayendo malo, cu ta sostene un gabinete Wever Croes cu na su opinion ta corecto y ta sincero cu pueblo.

“Ta increibel scucha e ex gobernante y ex lider di MEP bin dilanti y acusa tur rival politico y Hulanda, di ta culpabel pa sembra division, cu argumentonan sin sentido mientras cu e realidad di e situacion, ta resultado di un maneho di su partido na cabes di e actual gobierno.

Ora cu pueblo scucha Nel Oduber bisa cu constantemente rivalnan ta crea division den pueblo, ta usa salelitenan pa bruha cos y ta acusa su gobierno actual di ta corupto, usa souffleurnan pa bruha cos y trata constantemente di dividi pueblo, mas cu tur cos, Nel Oduber ta papia di su mes y di su gobierno actual.

C’un curashi hamas bisto Nel a tribi di papia cu na 2017 e gobierno actual a hereda un “mega debe”, entre otro splicando cu di cada florin, 97 cen ta bay pa paga debe y ta resta 3 cen pa tur otro cos.

Mescos cu e Prome Minister actual y e Minister di Finansa, e grito politico aki a wordo usa como un arma politico den pasado pero Nel mescos cu su gobierno, ta lubidando cu na e momentonan aki, gobierno di Aruba pa motibo di e pandemia cu mundo ta confrontando, lo aumenta e mega debe aki caminda tin cu puntra si ta resta tres cen ainda pa sigui traha.

Ta increibel cu Nel ta purba laba man di su gobierno, cuestionando kico ta pasando, cuestionando rivalnan politico sin mira den su propio direccion.

Na 2009 na momento cu gobierno di Nel Oduber a wordo manda  cas pa pueblo, no tabata pa bon gobernacion y bon maneho pero pueblo a manda un gobierno totalmente di MEP cas, pa motibo di mal maneho, pa motibo di a habraca economia y situacion financiero di e pais y cu a laga hopi problema serio atras.

Nel a retira di politica pero actualmente ta sigui como consehero di e actual gobierno combina di MEP, lagando un desaster den diferente instancianan manera SVB, caminda fondo di pension tabata coriendo peliger serio, lagando scolnan na werki, caminda plafond di scolnan tabata bin abou riba studiantenan.

A laga e fondo di pension na rand di bancarota, lagando un aparato publico atras caminda a emplea miles di su hendenan y awe e ta cuestionando di con Hulanda ta exigi pa manda 1500 trahado di gobierno cas.

Nel su famia completo a haya trabou for di su gobierno, tanto aki como na Hulanda y awor cu gobierno di MEP ta na mando, e no kier realisa cu loke su gobierno a haci, tabata e inicio di tur e problema cu Hulanda tin cu Aruba awe.

Otro gobierno dirigi pa MEP a drenta na 2017, sigurando henter pueblo cu e tin plan pa drecha e situacion financiero sin cu tin mester di aplica medida manera a famoso BBO cu ta un producto di Nel Oduber su gobierno.

E gobierno di MEP aki  a sigura pueblo cu nan lo goberna cu shete Minister pero a bira nombra practicamente nuebe Minister y  despues a dicidi di nombra varios ‘semi’ minister den rol di consehero manera Nel mes, Edison Briesen, Nilo Swaen, Rudy Croes y otronan, kendenan ta practicamente gobernando e pais pa gabinete Wever Croes.

Cu ki curashi Nel ta bin dilanti awor y mira den direccion di otronan, den direccion di Hulanda, sabiendo bon cla cu ta Prome Minister Evelyn y Minister di Finansa Xiomara, a firma un protocol cu Hulanda, cu nan lo bay reduci gasto di personal, cu nan lo manda 1500 hende cas.

E presion cu gobierno di Reino ta eherciendo awor contra di Aruba, ta  a base di decision di e propio gobierno di MEP na mando, ya cu ta nan a firma e protocol aki, ta nan a sigura for di dos aña pasa, cu nan lo haci esaki pa evita asina medida di parti di gobierno di Reino.

Sinembargo Nel no ta comprondo cu ta gobierno di MEP actual a crea e scenario aki, a core bisa Hulanda pa scapa cara cu nan lo drecha loke nan mes a daña y awor cu prestamo di 1.3 biyon solicita, e debe nacional  a sigui crece pero caminda gobierno di Hulanda kier mira e gobierno aki haci loke el a priminti y sigura Hulanda di haci.

Lo tabata na su luga pa Nel Oduber a bin dilanti y puntra e gobierno actual di cual e ta consehero, di con miles di hende no ta haya e pago di FASE, di con tin miles di hende sin trabou pero no a ricibi e 950 florin cu tanto Prome Minister Eveln como Minister Glenbert Croes a priminti cu nan lo ricibi e ayudo aki.

Nel no mester mira den otro direccion, splica miles di e hendenan aki cu a solicita pa bin na remarca pa haya e ayudo di 950 florn, a pasa un luna sin entrada, cu nan no tin placa ni pa come corda pa cumpli cu otro obligacionnan.

Como consehero Nel gasta su energia y trata di yuda e hendenan aki, papia y insisti como conserho pa e hendenan aki haya un ayudo cu placa cu Hulanda a pone disponibel pa esaki.

En berdad Hulanda tin e deber moral y segun Statuut pa yuda Aruba pero ora cu Nel kier acusa oposicion di weganan politico, ta parce cu e kier acusa oposicion pa  e falta di capacidad di e gobierno cu e ta consehando.

Tur loke ta pasando cu gabinete Wever Croes na e momentonan aki, ta loke nan mes a priminti Hulanda di lo bay haci, no ayera, ni luna pasa pero for di dos aña y mey caba, caminda e gobierno aki no solamente a gaña henter pueblo di Aruba pero awor kier gaña Hulanda tambe y keda sin cumpli c’un protocol cu nan a sigura Hulanda di lo ehecuta.

Nel Oduber ta acusa awor tur hende di otro fracaso di un gobierno di MEP, sindicatonan, CFT y ta papia cu tin instancianan cu kier yuda AVP dor di ‘leak’ documentonan pero un gobierno cu ta promove transparencia, lubindando por completo cu ta su persona a bin cu e asina yama ‘brievenbus’ di documentonan cu tabata leak den pasado.

Ta bon pa mustra Nel Oduber y su actual gobierno, caminda el a wordo asigna como relacionista publico di gabinete Wever Croes, cu partido AVP simplemente ta mira loke pueblo tambe ta mirando, esta un gobierno cu no tin solucion pa pueblo, un gobierno cu tin solucion solamente pa interes di famia- y amigonan, di sponsor y sostenedonan di partido MEP,” Melvin Tromp di AVP a declara.