Proyecto Watty Vos Boulevard ta un ehempel con cla cu ora un gobierno ta traha a base di un vision, e ta logra mucho mas beneficio pa pueblo comparan c’un gobierno manera cu tin awor aki, cu no tin vision y ta keda solamente castigo y problema serio pa pueblo.
Lider di fraccion di AVP, sr Marlon Sneek durante conferencia di prensa di su Partido, a mustra cu e soft opening cu a tuma luga siman pasa di e proyecto Watty Vos Boulevard ta muestra con gobierno di AVP a bin logra ehecuta un vision cu tabatin 30 aña den preparacion.
Sr Sneek a mustra cu mester a pasa den diferente proceso pa logra ehecucion di e proyecto aki, cu ta sirbi interes di henter pueblo y caminda practicamente por tuma nota di e alivio grandi cu e proyecto aki ta brindando na taxistanan, mayornan cu tin hiba yiunan scol, ciudadanonan cu mester bay y bin for di trabou tur dia.
“Sin duda un momento pa duna pueblo pabien cu e bunita proyecto aki y tambe ta na su luga pa felicita e Minister cu tabata encarga cu ehecucion di e proyecto aki, esta Benny Sevinger, ya cu awor di repiente por scucha ta papia di gobernacion ta un continuacion.
Ta bon pa pueblo sa cu e proyecto aki ta uno cu tabatin 30 aña den preparacion caminda gobierno a bin y gobierno a bay, cumprando diferente pida tereno cu mester a cumpra pa por a ehecuta e proyecto aki.
Den e proceso aki nos tin cu mustra cu bou di ningun gobierno di MEP, ni un solo meter di tereno a wordo cumpra loke ta mustra cu gobiernonan di MEP nunca a kere den e proyecto aki.
Semper tabata un gobierno di AVP mester tabata na turno pa sigui pusha e proyecto, cumpra e terenonan cu mester a wordo cumpra pa asina por a garantisa cu awe nos tin e joya di caretera aki y cu orguyo nos por bisa cu ta un caretera cu ta duna realce na loke ta calidad di bida di cada un di nos ciudadanonan.
Ta un momento di hubilo, un momento di orguyo ora cu bo mira cu bo tabatin un vision y awe e vision ey ta bin culmina den un proyecto, ya cu esey ta importante ora cu bo ta sinta como gobierno, bo mester tin un vision di kico bo kier logra pa pueblo.
Mi ta sigur cu tabatin hopi hende cu na momento cu e proyecto aki a cuminsa of e tabata bou construccion, tabata puntra nan mes di con e caminda aki y awe nan mes por contesta nan mes ora cu nan haci uso di e caminda aki y mira e importancia di e proyecto pa loke ta mobilidad mas facil pero caminda dentro di poco lo por mira tambe e bentahanan economico cu e proyecto aki ta garantisa pa desaroyo di nos pais.
Pues otro proyecto cu den e vision total di garantisa entre otro trabou pa nos ciudadanonan, banda di esaki crea un sistema di mobilidad pa nos comunidad por haci uso di esaki,” lider di fraccion di AVP, sr Marlon Sneek a declara.
