fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Gobierno a para tur ayudo na centronan di adiccion pero ta papia di “Ser Humano central”

Recientemente den conferencia di prensa di fraccion di AVP, Robert Candelaria a papia di perdida di forsa di compra. Esaki, el a bisa, tin hopi implicacion y tambe consecuencia grandi pa e bida social den  comunidad. No ta desconoci pa pueblo cu Aruba ta pasando den temponan social y financiero hopi dificil y cu forsa di compra ta cayendo bastante den poco tempo. “Esaki no ta partido AVP ta bisa, esaki ta loke cartera di pueblo ta bisa. Esaki ta loke profesionalnan den field manera entre otro esnan cu ta traha den polis, enseñansa, maneho di adiccion di droga, ta bisando.”

E caidanan di forsa di compra lamentablemente, Candelaria ta bisa, ta afecta mas area den bida di nos comunidad cu djis nos cartera so. A papia ultimo biaha riba e efectonan social cu e aumento di prijs ta ocasionando, pero Robert Candelaria kier papia specificamente riba otro efectonan cu e caida di forsa di compra ta ocasiona. Pa haci’e poco mas specifico, ta papiando di e efecto di caida di compra riba e area di adiccion na droga.

Papiando cu hendenan trahando den field, nan ta hopi preocupa pasobra e maneho di drogadiccion no ta bayendo bon. “Por bisa cu e Minister encarga cu e cartera aki, no tin maneho mes y e consecuencianan cu esaki ta trece cun’e, a cuminsa bira mas y mas visibel. Den nos comunidad tin centronan di iglesianan Cristian cu ta traha cu adicto pa yuda nan sali di nan adiccion. E centronan aki ta purba funciona mas tanto cu ta posibel pero riba nan mes forsa, yuda esnan den adiccion di droga y alcohol pa liberanan di nan adiccion y haya un miho bida. E miho bida aki lo ta den beneficio di e ex adicto, pero tambe e famia di e ex adicto y na final di dia na beneficio di e comunidad completo. Molester cu e persona aki tabata trece den pasado lo stop y e lo bira un persona limpi di droga cu ta contribui na su comunidad. Pero pa maneha un centro asina, ta un operacion hopi costoso.”

Pa hopi aña, e centronan aki tabata ricibi yudansa den forma di cuminda pa e habitantenan di e centro. Tambe tabata yuda paga un sueldo basico pa un persona. Lamentablemente por tuma nota cu e sosten aki tambe a wordo para bou e Gobernacion aki, ta locual Robert Candelaria a trece dilanti. Despues cu a trece esaki na conocemento di comunidad, nos ta contento cu e issue aki a haya oido parcialmente di Gobierno. Pero e no a haya oido cerca e Minister indica cu ta Dangui Oduber, pero si cerca su colega Glenbert Croes, pa re-anuda pago di sueldo di personanan bek. 

Te dia di awe, ya pa hopi luna caba, tin un persona cu despues di hopi aña di servicio den un Centro, no ta haya su entrada mas. Con por bisa cu tin e ser humano central y bo no ta yuda den esaki. No mester a haci nada, ta algo cu tabata regla caba. E Minister djis mester a laga Loke ta bon, continua. Nada mas. Pero ta bay contra loke ta bisa y ta stop e yudansa cu nan tabata ricibi.

Robert Candelaria no por compronde e movecion. Kiko e intencion ta? 

Esaki ta pone cu pueblo y famianan mester carga un peso innecesario. E prijs aki ta pueblo mester bay pag’e y por a evita esaki door di djis continua of mehora e maneho cu bo a bin haya. 

Robert Candelaria su preocupacion ta cu esnan cu ta labora pa sirbi nos comunidad y yuda adicto pa sali di nan adiccion y gosa di un miho bida, no ta hayando e yudansa cu nan mester pa por sigui labora. Tur esaki ta pasando na momentonan hopi dificil pa nos comunidad. Hopi hende ta sigui cay den problema di adiccion y mester bini cu solucion real y duradero lihe.