Segun sra Arends-Reyes dia 27 di September tur aña ta dia internacional di Turismo y mirando cu Aruba tin un dependencia asina grandi riba Turismo ta un momento pa nos refleha ariba e industria y su futuro. Internacionalmente e topico di e aña aki ta trabou of ‘jobs’ den e mundo di Turismo y kiko ta e puntonan di enfoke internacionalmente pa traha riba un desaroyo di Turismo cu ta contribui na un mihor futuro pa tur. Turismo ta contribui na e  economia di e pais pero alaves mester ta hopi enfoka ariba e weso di lomba di e industria cu ta su trahadornan. Tin hopi inovacion y e revolucion tecnologico tin gran impacto den e industria pero e no necesariamente por reemplaza locual ta e trabounan cu ta existi caba pa cu Turismo, e lo mester bai man den man cu otro. Si lo mester traha ariba e actualisacion di leynan anticua y tambe e parti di maneho of ‘policy’ tambe di cada compania y doño di trabou mester ta enfoca hopi ariba e trahador y con lo por percura pa nan lugar di trabou ta uno sigur ‘safe’ y agradabel, cu pago y trato husto caminda tin espacio y motivacion pa percura pa e trahadornan por sigui bai dilanti den nan trabou y contribui na e mobilidad social pa cu Aruba. Un trahador tambe mester por tin oranan disponibel pa pasa tempo liber cu su famia y mester tene cuenta cu su salud en general. Na momento cu traha ariba un mihor futuro y condicionan laboral ta traha ariba pas, seguridad y inclusion social di un pais. Turismo y e trabou den e industria tambe ta forma parti di diferente metanan global sostenibel manera entre otro ta boga pa e trabou den Turismo ta forma parti di meta cu ta ‘decent work’ of trabou decente y reconoci.  E trend mundial den Turismo ta cu servicio y food & beverage lo continua ta importante pa e exito di un destinacion cu ta depende di Turismo. Pero mas y mas e companianan Micro, Small y Medium den Turismo cu ta emplea entre 10 pa 50 persona tambe lo ta e mayor forsanan di creacion di trabou den e industria pero semper cu e pensamento di keda sostenibel pa por contribui na e diversificacion den e industria y contribui na e desaroyo socio economico. Tambe un punto di sumo importancia ta e hasi e ‘gap’ entre locual e studiantenan ta studiando den teoria y locual den practica ta necesario pa implementa den e trabou diario. Tur e puntonan menciona lo mester bira un esfuerso colectivo pa continua ta un destinacion exitoso y cu mas tanto e bishitante, trahador y localnan por ta beneficia di e desaroyo.  Finalmente sra Arends-Reyes kier a felicita tur persona cu ta traha den e industria di Turismo y gradici nan  pa nan esfuerso pa nos pais.