Parlamentario drs. Mervin Wyatt-Ras hunto cu diferente coleganan di Aruba y en total 40 pais Latino Americano y di Caribe a reuni na Havana pa debati encuanto diferente topico. Esaki den e comision di Equidad y Genero, ninez y hubentud den cuadro di Parlamento Latino Americano y di Caribe.
Parlamentario Wyatt-Ras den e comision di Equidad di genero, ninez y hubentud a obtene informacion importante for di representante di Nacionnan Uni encuanto topiconan di paz, igualdad y violencia politico contra di hende muher. Pronto lo tin un seminario al respeco pa loke ta trata reglamentacion, prevencion y sanccion di violencia contra hende muher den politica. Especialmente den paisnan cu tin violencia en general leynan a ser pasa al respecto.
E paisnan cu ya tin proteccion contra violencia politico den nan leynan ta e.o. Argentina(2009), el Salvador (2011), Bolivia y Panama (2013), Paraguay (2016) y Ecuador, Uruguay (2018).
Aunke nos no ta admiti tin violencia politico den nos region y hasta na Aruba, p.e. ora un partido politico Mep a saca 2 miembro femenino for di nan seno djies pasobra nan a vota pa un ley pa despues sigui cu acoso verbal di e miembronan saca den Parlamento. Wyatt-Ras a pasa den esaki, locual a haci’e mas fuerte como persona y politico.
Un otro topico importante cu a ser trata ta e ley di Grooming, esta acoso via cyber y medianan social di especialmente mucha y hoben muher. Pronto lo tin un forum al respecto esta pa trata e topico di seguridad di cyber. Esaki ta un topico hopi actual mundialmente. Ta importante pa proteha especialmente nos hubentud contra di malhechornan via di internet. Nos mester busca formanan no solamente pa prevencion sino tambe pa sancion. Durante e estadia e delegacion a bishita entre otro un skol yama “solidaridad con Panama” den cual ta educa y trata muchanan cu descapacidad cognitivo y fysico. Tabata impresionante pa mira con cu medionan limita tog ta logra duna acohida, cuido, guia y ensenjanza na hobennan special y ubica nan na trabou. Tin di nan hasta a bira dokter y abogado. Por bisa cu tabata 2 dia hopi fructifero di intercambio. Sinembargo Mervin Wyatt-Ras tin cu senjala cu un miembro di parlamento cu e biaha aki no a bai den delegacion, esta Endy Croes di mala fe a ganja den un conferencia di prensa cu Wyatt-Ras a participa na comicion di ensenanza mientras esaki no ta cuadra cu berdad. Si ela haci su huiswerk bon elo a ripara cu Wyatt-Ras ta den comision di Equidad y genero. Endy Croes alavez a tira na cara di Wyatt-Ras cu ela viaha mientras e ta critica ministernan. Esaki tampoco no ta cuadra cu realidad. Paso no por compara e viahe di Parlamentarionan cu esun di ministernan.
E viahe di Parlamentarionan, incluyendo Endy y Mervin ta limita na 2 te 3 biahe pa anja y ta transparente. Es decir tur hende cu subi decos por mira na unda cual parlamentario a viaha y pa cuanto dia cu ta limita. Siendo cu e viahenan di ministernan di e gobernacion aki ta inlimita y caro. Tin di e ministernan casi no ta na Aruba. Esey no ta Wyatt-Ras ta bisa. Esey ta nan mesun hendenan y votadornan ta keha. Ademas nan ta bai cu un cantidad di persona di nan buro. Dor cu Wyatt-Ras y su coleganan di fraccion a critica e ministernan, gobierno no ta mandando informacion Parlamento mas ora nan ta viaha, ni na unda ni cuanto dia.
Contrario na viahenan di trabou di Parlamento y departamentonan di gobierno e viahenan di ministernan a bira incontrolable pa parlamento. Nan ta bai paisnan leu manera p.e. Estonia y Samoa, cu placa di pueblo. Esey no por. Pueblo mester sa unda su gobierno ta y kico e ta haci. Por mira cu sr. Endy Croes ta apoya esey envez di cuestiona gobierno. Ta visto pues cu Endy no ta compronde su trabou. Endy Croes ta bai mas leu ainda di critica viahenan personal di Wyatt-Ras. Wyatt-Ras mescos cu mayoria Arubiano ora di vacacion ta viaha, cu pago di su propio cartera y no di pueblo. Esey no ta hustifica cu ministernan por bai lugarnan leu riba custia di pueblo. Pero manera cos ta bai cu costo di bida halto y medida tras medida, djies aki ni nos hendenan ni Wyatt-Ras lo por bai cu vakantie mas. Endy Croes mester wak su mes y su gobierno y para banda di pueblo envez di cuestiona otro cu si ta sali na defensa di nos pueblo.
