Recientemente na Boneiro tabata tin un reunion cu e Organización Democrata Cristiana de America (ODCA). E organisacion regional di Merca di e partidonan democrata Cristian of di influencia ideologico den humanismo Cristian y ta funda desde 23 di April 1947. Partido AVP ta forma parti di e ODCA y aki Parlamentario di AVP, Robert Candelaria a presenta e partido den nomber di Mike Eman.

E intencion di e bishita di e Parlamentario na e encuentro aki tabata pa fortifica e lasonan di Union Patriotico Boneriano (UPB), Partido Nashonal di Pueblo (PNP) di Corsou, AVP y ODCA. Tambe a tuma e oportunidad pa felicita UPB pa cumpli 49 aña di existencia. Durante e anochi di e ceremonia Parlamentario Candelaria a duna un speech unda cu e den nomber di lider di Partido AVP Mike Eman el a felicita e partido di Boneiro.

El a tuma e momento aki pa splica na tur esunnan presente con hopi e ta kere den e principionan di partidonan Cristian Democrata. “Nos tin cu wanta na e principionan y eherce nan, pa asina crea confiansa den politica riba nos islanan bek.” Tambe ta bon pa tur traha hunto bek y yuda otro. Parlamentario Candelaria ta agradecido p’e oportunidad cu el a ricibi di fortalece e lasonan cu partidonan democrata.

FIN