Fraccion di AVP ta hopi preocupa cu e informe suministra door di Banco Central cu ta mustra cu cifra un caida den e confiansa di parti di sector commercial den loke ta trata economia. “Cu e informacion aki nos a inicia un serie di reunion cu gremionan pa confirma e sentimento aki,” Parlamentario Sr. Richard Arends a splika. “Despues cu lider di Partido AVP a trece esaki dilanti den un conferencia di prensa no a inicia e dialogo cu e.o. Camara di Comercio di Aruba cu e hechonan aki y nan tambe ta reconoce e desaroyono negativo aki.”

E encuesta haci door di BCA unda cu e conclusion mas severo cu e ta mira ta ora cu a resulta cu 21% di e empresanan encuesta ta kere cu nan lo no saca ganashi mas e aña’ki. Loke ta resalta ta cu net despues di eleccion e “Business Perception Index” a keda positivo, pero den prome cuartal el a cuminsa baha y cu den e di dos kwartaal esaki a baha drasticamente hasta compara cu añanan anterior.“Esaki no solamente ta un preocupacion, pero ta un confirmacion tambe di e preocupacionan cu nos a bin ta vocifera den e ultimo lunanan.

“Cu e resultado aki Banco Central ta uni su mes na e lista di instancianan independiente, manera Standard & Poor’s y Fitch cu tambe a duna un “negative outlook” e periodo nos dilanti.” Segun e Parlamentario, Camara di Comercio no ta keda atras: despues di a duna Gobierno nobo beneficio di duda awor ta momento pa wak accion nan concreto pa cu economia y vision pa nos pais.

Arends a bisa cu lider di Partido AVP tabata e prome pa trece e tema aki dilanti, cu pruebanan di e resultadonan di e encuesta haci door di BCA. “No ta AVP a trece e desaroyo aki dilanti, sino e cifranan presenta door di Banco Central ta señala esaki hunto cu e otro instancianan y gremionan.” E parlamentario pa fraccion berde ta bisa tambe cu e desaroyo aki ta yena nan cu preocupacion pasobra nan a bin ta mirando un falta di proactividad, un falta di maneho economico, un falta di decisionnan riba maneho financiero. “Presupuesto 2019 tin un deficit di 130 miyon florin compara cu 2018, pero nos no sa ken ta paga p’e si ta papiando di un reforma fiscal pa dia prome di januari 2019 y cu e crisisheffing lo tabata pa un aña,” Sr. Arends a ilustra. “Den sector priva tin un incertidumbre hopi grandi si lo corta gastonan di Gobierno, of si lo bay aumenta entradanan di impuesto ta bin riba lomba di pueblo of empresanan local.”

“E incertidumbre aki ta fatal pa bo economia.” Parlamentario Arends ta di opinion cu un gobernante tin e deber di trece trankilidad y stabilidad, “pero si bo ta sali afo y grita cu tin crisis, cu tin caos y e pais ta wordo gedowngrade, e ta bisa hopi mas di bo capacidad pa maneha e desafionan y problematicanan compleho cu gobernacion ta trece cun’e. Ser gobernante ta un reto, finanza publico ta un reto, pero cu un maneho proactivo por contraresta esakinan.

“Manera cu a bin ta hasi durante e prome aña di gobernacion, ta manda señal totalmente robez pa sector priva.” E Parlamentario a splika cu si bo ta un comerciante y un bo mester bay na un instituto financiero, pero e director ta tende un mandatario ta grita cu tin crisis y caos, e no ta duna e director pa por fia e inversionista e placa y asina pone economia lora. “Resultadonan di e estudio di Banco Central, como tambe e sentimento cu ta biba eyfo, ta confirma tambe cu inversionnan ta wordo para.”

Esaki siguramente tin su efecto riba actividad economico, cu consecuentemente ta traduci nan mes den menos entradanan cu Gobierno a presupuesta.