Mescos cu e actual gabinete Wever Croes a dicidi di no cumpli cu promesanan haci na pueblo durante di campaña electoral, e tres fraccionnan den parlamento cu ta sostene gobierno, no ta cumpli cu nan promesanan na pueblo.
Lider di fraccion di AVP, sr Marlon Sneek a mustra cu ta mesun fraccionnan aki na momento ci huramenta como miembro di parlamento a sigura pueblo cu nan lo traha na interes di pueblo, lo controla maneho di gobierno na interes di pueblo, awor nan tambe ta practicamente iinstrumento di nan gobierno.
“Ta bisto pa tur hende kico ta pasando, con e fraccionnan cu ta sostene gobierno, ta acepta un rol cu ta kita e control di pueblo riba gobierno, for di pueblo ya cu e sentimento pa sirbi gobierno, ta bin na prome luga y sirbi interes di pueblo no ta existi.
No ta usual c’un miembro di parlamento ta dirigi palabranan di felicitacion, duna pabien na prome minister, pa motibo cuel a firma presupuesto 2019 sin cu el a mira contenido di un presupuesto cu e mes ainda tin cu bay controla den nomber di pueblo.
Ta felicita prome minister sin cu e parlamentario ta realisa cu e presupuesto aki tin henter un trayecto pa cana ainda prome cu e yega parlamento, ya cu despues cu e minister firma esaki, e tin cu bay CFT y ora cu e bin bek di CFT, minister tin cu contesta CFT, pa despues e bay Raad van Advies y despues cu RvA haci su control, ministernan tin cu bay contesta RvA.
Despues di e trayecto aki e lo yega Parlamento pa e ora bay wak contenido di e presupuesto y aki un hende ta cuminsa grita pabien, aplaudi sin cu el a wak e presupuesto mes y esaki ta bisa pueblo caba cu e ink ta cla pa stempel apropacion riba e presupuesto 2019.
Loke ta haci e situacion aki ainda mas serio y cuestionabel, ta ora cu nos a tuma nota di un articulo di declaracion duna pa prome minister Evelyne Wever Croes, kende a declara:
“Gobierno ta sigura cu pa 15 di december cu presupuesto 2019 lo ta aproba.”
Pues cu esaki prome minister ta manda bisa su cheerleadernan pa nan prepara e stempel pasobra prome cu dia 15 di december e presupuesto aki mester ta cla, sin cu parlamento a haya e presupuesto ainda pa mira, caminda tin cu bay haci preguntanan riba diferente aspecto riba cual kier splicacion di gobierno, pero ya caba prome minister a manda su mandato pa e tres fraccionnan cu ta sostene gobierno.
Aña pasa cu tabatin cambio di gobierrno y cu a pone cu e tempo cortico pa hinca presupuesto den otro mes gobierno a ricibi casi 3 mil pregunta di cual 2 mil a keda sin contesta pero awor pueblo por constata cu gtobierno a manda un mensahe ‘loud and clear’ pa esunnan cu ta sostene e gobierno aki, cu pa dia 15 di december presupuesto mester ta aproba.
Esaki ta e forma cu e gobierno transparente aki ta atende cu parlamento y esaki ta e parlamentario cheerleadernan cu ta cla pa vota, cu ta duna pabien, cu ta bati man, sin cu ainda nan por a mira of sa contenido di e presupuesto aki.
Locual si nos ta na altura di dje riba e presupuesto aki, ta cu tin mas medida na caminda pero prome minister no tin e curashi pa bin dilanti y bisa pueblo ki tipo di presupuesto el a entrega pa 2019 pero ya tin cheerleader den parlamento cu ta felicita gobierno pa esaki,” Parlamentario Marlon Sneek a trece dilanti.
