Prome Minister un biaha mas den un conferencia di prensa a bin dilanti caminda un biaha mas e ta hunga cu sentimento di comunidad, caminda e prome minister aki for di inicio di su gobierno, a bin ta haci uso di un caso lamentabel caminda dos mucha a perde nan bida, pero caminda gobierno despues di casi un aña na poder, ta sigui colga riba mesun tema doloroso aki.

Lider di fraccion di AVP, sr Marlon Sneek  a anfatisa cu mientras cu ya caba ta conoci pa tur hende cu Prome Minister no por cumpli cu promesanan cu el a haci na pueblo, su persona tambe ta esun cu a sigura pueblo cu su persona ta esun cu a presenta un  ley di iniciativa pa un castigo minimo pa loke ta abuso di mucha.

Evelyne Wever Croes sigurando pueblo cu den seis minuut e lo haci e cambionan cu falta y cu ta dos regel so e tin cu cambia y pone acerca pa  e ley wordo entrega y awor despues di un aña cu a pasa bay, ainda e prome minister ta hunga cu dolor di hende y su persona no por presenta e ley cu tanto el a priminti di haci y no  a haci esaki ainda.

“Ta di lamenta cu cada bes prome minister ta haci uso di e caso tristo aki, caminda cada bes cu e trece e caso aki dilanti, e tin cu corda cu ta e famianan nan dolor e ta bolbe mishi cu nan, cada bes recordando e drama doloroso aki sin cu ta mustra e famia of comunidad kico e gobierno mes a bin ta haciendo relaciona cu esaki.

Ni e cambio di ley pa castigo minimo pa abusadonan di mucha cu prome minister a priminti cu e lo pasa den seis minuut, no a wordo haci manera cu el a priminti, ni den 11 luna den gobernacion corda den seis minuut.

Loke ta mas ta  cu a pone un fondo di 17 miyon disponibel y awo ta busca manera pa crea un ley pa hinca e fondo den un ley nobo. Esaki pasobra un aña a pasa bay sin por a haci uso di e fondo di 17 miyon aki.

Realmente increibel cu e Gobierno ta bisa cu e pais ta den un crisis social, ta haya 17 miyon florin pa traha cun’e y no a haci uzo di dje ainda. Esey ta e realidad cu nos ta biba.

Un Gobierno cu un cantidad di hende inepto cu no sa kico ni con mester haci cierto cosnan. Pero tur dia ta para dilanti microfon y purba crea un situacion na nan bentaha. E crisis cu nos tin yama Gabinete Wever Croes,” lider di fraccion di AVP, sr Marlon Sneek a declara.